VARSHAVË – Polonia intercepton një avion zbulues rus mbi Baltik

VARSHAVË, 14 korrik /ATSH-AFP/ – Dy avionë luftarakë polakë interceptuan sot një avion zbulues rus, tip “Il-20” mbi ujërat ndërkombëtare të detit Baltik, njoftoi ministri polak i Mbrojtjes, Władysław Kosiniak-Kamysz.

Sipas tij, kjo ishte përpjekja e parë pas një kohe të gjatë nga Rusia për t’iu afruar kufirit detar të Polonisë me qëllim testimin e sistemeve të mbrojtjes ajrore të vendit.

Ministri deklaroi se incidenti është një tjetër dëshmi se Rusia po zhvillon një “luftë hibride” kundër Polonisë, anëtare e NATO-s dhe Bashkimit Evropian, që prej nisjes së pushtimit të plotë të Ukrainës në vitin 2022.

Ai shtoi se Moska vazhdon të kryejë misione zbulimi dhe të shfaqë qëndrim armiqësor ndaj vendeve të Aleancës Atlantike.

Ngjarja ndodhi rreth 30 kilometra larg qytetit bregdetar Ustka, në veriperëndim të Polonisë. Pas ngritjes në ajër, dy avionët luftarakë polakë vendosën kontakt me avionin rus dhe i kërkuan të largohej nga zona.

Sipas ministrit të Mbrojtjes, avioni zbulues rus ndryshoi kurs dhe u largua në drejtim të Rusisë, duke i dhënë fund incidentit pa përshkallëzim të mëtejshëm./  /Ad.Ab./ a.jor.