Veseli në SHBA, merr pjesë në Konferencën Parlamentare Globale

Kryetari i Parlamentit të Kosovës, Kadri Veseli, po qëndron në Uashington, ku sot ka marrë pjesë në Konferencën Parlamentare Globale të Bankës Botërore dhe Fondit Monetar Ndërkombëtar.

Veseli, nëpërmjet një postimi në faqen e tij zyrtare në Facebook, ka treguar se është takuar dhe ka këmbyer pikëpamje me shumë përfaqësuesh parlamentesh dhe vendimmarrës nga e gjithë bota.

“Sfidat e zhvillimit ekonomik dhe forcimit demokratik të institucioneve kapërcehen shumë më lehtë duke mësuar nga përvojat e ndryshme ndërkombëtare”, ka shkruar Veseli në rrjetin social.