Vetëvendosje: Policia po na provokon

Lëvizje Vetëvendosje thotë se është duke u provokuar nga policia për shkak të organizimeve për protestën e sotme.

Në një njoftim, VV ka thënë se rreth orës 20:00 Policia ka tentuar të ndalojë disa aktivistë afër zyrave të Lëvizjes Vetëvendosje, transmeton Koha.net.

Sipas partisë së Visar Ymerit policia kishte rrethuar zyrat e kësaj lëvizje për pak kohë, por tani situata është më e qetë.

“Sot rreth orës 20:00 policia tentoi të ndalojë disa aktivistë afër zyrave të Lëvizjes Vetëvendosje. Arsyet nuk u bënë të ditura. Për disa minuta zyra e Vetëvendosjes ka qenë e rrethuar nga katër makina të policisë.

Ne dyshojmë se këto janë provokime për shkak të organizimeve për protestën gjithëpopullore të datës 17 shkurt. Por, pas pak kohe policia vendosi të largohet. Tani situata është e qetë”, thuhet në njoftimin e VV-së.