Zëvendëskryeministrja takim me përfituesit e “Paketës së Maleve” në Vaun e Dejës: 400 zona zhvillimi të miratuara

Zëvendëskryeministrja Albana Koçiu zhvilloi këtë të enjte një bashkëbisedim me aplikuesit dhe përfituesit në fazën e parë të “Paketës së Maleve” për Bashkinë e Vaut të Dejës.

Sipas Koçiut, përfituesit e parë të kësaj nisme do t’i kthejnë tokat e të parëve nga vende kujtimesh në hapësira zhvillimi dhe mundësish për familjet e tyre dhe ekonominë lokale.

Ajo bëri të ditur se deri më tani janë miratuar mbi 1 mijë e 200 aplikime, ndërsa janë përcaktuar më shumë se 400 zona zhvillimi në 52 bashki të vendit.

“Deri më sot, përveç Vaut të Dejës dhe në bashki të tjera, janë miratuar mbi 400 zona zhvillimi, në 52 bashki të vendit. Kemi mbi 1 mijë e 200 aplikime të miratuara deri më tani, çka do të thotë se interesi ka qenë i jashtëzakonshëm”, tha Koçiu.

Zëvendëskryeministrja theksoi se Paketa e Maleve synon të përfshijë edhe shqiptarët e diasporës që kanë prona të trashëguara në vend, duke krijuar mundësi për zhvillimin e tyre edhe në rastet kur ka pasur pengesa për shkak të mungesës së dokumentacionit të pronësisë.

“Paketa e Maleve fton edhe të gjithë ata shqiptarë të diasporës, të cilët i kanë shtëpitë e tyre këtu, por nuk kanë arritur ta zhvillojnë akoma më shumë idenë e tyre për të përmirësuar jetën dhe cilësinë në vendin apo në shtëpinë që kanë trashëguar. Tani jepet mundësia që të vijnë dhe të zhvillojnë pronën e tyre, pronën e poseduar prej vitesh, por në pamundësi për ta zhvilluar siç duhet për shkak të mungesës së titullit të pronësisë”, u shpreh ajo.

Gjatë bashkëbisedimit, Koçiu foli edhe për programin “Dyfisho Ndërmarrjen”, si një tjetër instrument për mbështetjen e ekonomisë lokale dhe bizneseve familjare.

Sipas saj, ky program synon të ndihmojë bizneset përmes kredive me interes të lehtësuar dhe garancisë sovrane për zgjerimin e aktivitetit.

“Nuk është i vetmi program që mundëson zhvillimin e ekonomisë lokale dhe ekonomisë familjare. Një program tjetër, i cili mund t’i bashkëngjitet dhe ta plotësojë Paketën e Maleve, është edhe paketa “Dyfisho Ndërmarrjen”. Bëhet fjalë për mundësinë që qeveria shqiptare jep, në bashkëpunim me Bankën e Shqipërisë dhe bankat e nivelit të dytë, për marrjen e një kredie me interes të lehtësuar 2-3 për qind deri në 10 vite, duke vendosur shteti garancinë e vet deri në 70 për qind përmes garancisë sovrane”, tha Koçiu.