Zjarri përfshin një kantier ndërtimi në Bruksel, raportohet për viktima dhe disa persona të zhdukur (VIDEO)

Disa persona humbën jetën nga një zjarr që shpërtheu të martën në një kantier ndërtimi në Bruksel, ndërsa po kryhen kërkime për të gjetur gjashtë persona të zhdukur, sipas autoriteteve lokale.

Një zyrtar tha se një numër ende i papërcaktuar trupash u gjetën në një nga dy ashensorët e një projekti të madh rinovimi në sheshin qendror Place de Brouckère, ku shpërtheu zjarri herët të martën në mëngjes.

Ai sqaroi se mbetet e paqartë nëse këto janë trupat e të gjashtë punëtorëve të zhdukur.

Nga ana e saj, Departamenti lokal i Zjarrfikësve njoftoi se më shumë se 200 punëtorë ishin në vendin e ndërtimit kur shpërtheu zjarri, duke shtuar se tre persona janë dërguar në spital.