Zvogëlohet rreziku i shpërthimit të rezervuarit kimik në Kaliforni

Zjarrfikësit që po përballen me një rezervuar të mbinxehur me kimikate të rrezikshme në Kalifornian jugore thanë se kishin eliminuar kërcënimin e shpërthimit të rezervuarit në një operacion gjatë natës.

Rezervuari kimik i dëmtuar në Kaliforninë jugore ishte çarë gjatë fundjavës, gjë që autoritetet shpresonin se do të lehtësonte presionin dhe do të zvogëlonte rrezikun e një shpërthimi.

Zyrtarët thanë se ekipet kryen kontrolle të temperaturës së rezervuarit natën për të zvogëluar rreziqet për zjarrfikësit, duke shmangur operacionet gjatë ditës kur nxehtësia nga rezervuari i bënte kushtet përreth tij më të rrezikshme.

Misioni gjatë natës i lejoi ekipeve të verifikonin çarjen dhe të konfirmonin se temperaturat po binin, tha të hënën në mëngjes shefi i divizionit të autoritetit të zjarrfikësve të qarkut Orange, Craig Covey. Covey tha se rezultatet e vlerësimit gjatë natës të rezervuarit ishin se temperatura brenda kishte rënë dhe se presioni ishte liruar.

Rreth 50,000 banorë në Garden Grove janë evakuuar dhe po presin një zgjidhje. Ende nuk është raportuar për të lënduar.

Presidenti amerikan, Donald Trump miratoi një deklaratë federale të emergjencës pas një kërkese nga guvernatori i Kalifornisë, Gavin Newsom. Deklarata vuri në dispozicion ndihmën federale për reaguesit e emergjencave përmes Agjencisë Federale të Menaxhimit të Emergjencave (FEMA).