10 vatra zjarri ende aktive, Ministria e Mbrojtjes: Reshjet e shiut normalizuan situatën në disa zona

Ministria e Mbrojtjes ka dalë me një përditvsim të fundit lidhur me situatën e zjarreve në vend deri në orën 20:00. Ministria e Mbrojtjes në njoftim bën me dije se gjatë orëve të fundit janë në ndjekje 13 vatra zjarri, nga të cilat 10 mbeten aktive.

Sipas njoftimit, 2 vatra janë nën kontroll dhe 1 është shuar plotësisht. Pavarësisht terrenit të vështirë dhe kushteve të pafavorshme në disa zona, mësohet se po vijon angazhimi i koordinuar i strukturave të Mbrojtjes Civile nga toka dhe ajri.

Në Lurë, raportohet një nga situatat më të vështira teksa po vijon operacioni me 200 forca bashkiake, 50 efektivë të FA-së, 15 efektivë të Policisë së Shtetit, 18 vullnetarë, 2 automjete zjarrfikëse dhe 2 avionë Air Tractor.

Ndërhyrja ka mundësuar kontrollin e zjarrit në segmentin pranë banesave dhe aktualisht nuk raportohet rrezik për zonat e banuara. Aktive mbetet edhe vatra në Qafë Helmes, Bulqizë-Selishtë, ku forcat operacionale kanë arritur të vendosin nën kontroll pjesë të saj.

Në Tiranë, vijon puna në Malin e Dajtit, me 9 forca të ADZM-së dhe 2 helikopterë të FA-së, ndërsa në Priskë dhe Farkë operojnë 30 forca të MZSH-së me 6 mjete. Situata në Priskë-Farkë paraqitet nën kontroll dhe pa rrezik për zonat e banuara.

Në Krujë, ndërhyrjet nga toka dhe ajri kanë dhënë rezultat në vatrat e Abazes dhe Zidollit. Gjatë ditës është përdorur mbështetja ajrore e FA-së, ndërsa në Zidoll, pas ndërhyrjes së helikopterit, situata është normalizuar dhe po punohet për izolimin dhe fikjen e plotë.

Në Gjirokastër, Lezhë, Elbasan dhe Shkodër vijon puna dhe monitorimi i vatrave të mbetura. Në Përmet dhe Qukës, reshjet e shiut po favorizojnë normalizimin e situatës, ndërsa vatra në Paulesh të Peqinit është shuar plotësisht. Në të gjitha zonat e raportuara nuk evidentohen rreziqe për zonat e banuara.

Ministria thwkson se AKMC, në koordinim me strukturat qendrore dhe vendore të sistemit të Mbrojtjes Civile, vijon ndjekjen e situatës dhe koordinimin e kapaciteteve operacionale, me prioritet mbrojtjen e jetës, banesave dhe kufizimin sa më të shpejtë të vatrave aktive.