Presidenti i Federatës së Futbollit të Kosovës, Agim Ademi, ka folur për ndarjen nga jeta të dy figurave të njohura të futbollit kosovar, Erdogan Celinës dhe Zenun Brovinës, në fillim të kësaj jave.

Në një intervistë në emisionin “Sports Show” në Klan Kosova, Ademi i cilësoi Celinën dhe Brovinën si dy figura të rëndësishme që kanë lënë gjurmë në futbollin e Kosovës.

“Vendi ynë humbi dy figura, dy ikona të futbollit, siç janë Erdogan Celina dhe Zenun Brovina. Dy emra që i dhanë shumë futbollit tonë dhe që do të mbahen mend për kontributin e tyre”, ka thënë Ademi.

Duke folur për Zenun Brovinën, presidenti i FFK-së veçoi kontributin e tij në përfaqësimin e futbollit kosovar në nivele të tjera, duke përmendur edhe periudhën kur ai ishte pjesë e Partizanit të Beogradit, një prej klubeve të njohura të asaj kohe.

“Zenun Brovina karakterizohet me përfaqësimin e futbollit kosovar në vende të tjera. Mbi të gjitha, është një prej futbollistëve të parë nga Kosova që ka shkuar në një klub si Partizani i Beogradit, që ka qenë një ndër klubet më të mira në atë kohë. Përveçse ka filluar te Vllaznimi në Gjakovë, ka qenë ndër lojtarët më të mirë të Vllaznimit dhe edhe aty ka lënë gjurmë”, ka deklaruar Ademi.

Ai u shprehu ngushëllime familjeve të të ndjerëve dhe gjithë komunitetit të futbollit.

Ndërkaq, duke folur për Erdogan Celinën, Ademi tha se e ka konsideruar atë si “kapitenin e të gjithëve”, jo vetëm për atë që ka treguar në fushën e futbollit, por edhe për karakterin e tij jashtë saj.

“Celina ka qenë një lojtar të cilin unë e kam vlerësuar dhe e kam cilësuar si kapitenin e të gjithëve. Jo që e ka pasur shiritin e kapitenit në të gjitha klubet ku ka luajtur, por vërtet në fushë ka qenë kapiten i vërtetë, por edhe jashtë fushe ka qenë një njeri i jashtëzakonshëm”, është shprehur Ademi.

Presidenti i FFK-së kujtoi edhe kontributin e Celinës në rolin e trajnerit, duke theksuar se ai ka qenë pjesë e ekipeve kombëtare dhe ka drejtuar edhe grupmosha të reja.

“Përveç si futbollist që ka qenë i jashtëzakonshëm, i pakompromis siç e quajnë në gjuhën e futbollit, ka qenë edhe një njeri i jashtëzakonshëm, një shok i jashtëzakonshëm, por edhe në zërin e trajnerit ka qenë një prej njerëzve më strategë që ka pasur Federata e Futbollit”, ka thënë Ademi.

Në fund, Ademi theksoi se kontributi i dy figurave do të mbetet pjesë e historisë së futbollit kosovar.

“Është humbje e madhe, por ata do të jetojnë me ne, me veprat e tyre. I shprehim ngushëllime familjes Celina dhe gjithë komunitetit, si dhe Prizrenit – qytetit të tij të parë”, ka përfunduar Ademi.