Ambasadori britanik viziton Kukësin, Abot bashkëbisedim me gazetarët: Më shumë vëmendje nga qeveria për rajonin

Ambasadori i Britanisë së Madhe në vendin tonë, Nikolas Abot, gjatë një vizite që ka ndërmarrë në zonën verilindore, u ndal edhe në RTSH Kukës. Në një bashkëbisedim me gazetarët, ambasadori Abot vlerësoi kontributin që jep media dhe gazetarët në tërësi në ecurinë dhe zhvillimet ekonomike, shoqërore e politike në vend.

Ambasadori u shpreh se Kukësi, për vetë specifikat që lidhen me ekonominë dhe emigracionin, ka qenë në qendër të vëmendjes së ambasadës, por edhe të qeverisë së Britanisë së Madhe. Në këtë kontekst, ambasadori u shpreh se edhe vizitat e shpeshta në Kukës janë për të kuptuar më mirë nevojat dhe problematikat, si dhe për të inkurajuar qeverinë shqiptare të punojë më shumë për këtë zonë.

Ambasadori Abot vlerësoi Radio Kukësin dhe RTSH Kukësin si një zë që i shërben jo vetëm Kukësit, por edhe më gjerë hapësirës shqiptare.

Ndërsa drejtori i RTSH Kukës, Johuz Hallaci, tha se diskutoi me ambasadorin rreth projekteve që mund të implementohen me ambasadën britanike.

Më herët, ambasadori zhvilloi një takim me kryetarin e bashkisë, Albert Halilaj.

Qeveria e Britanisë së Madhe, përmes ambasadës së saj në Tiranë, ka aplikuar një sërë projektesh në qarqet Kukës e Dibër në kuadër të masave frenuese të emigracionit, që ka përfshirë prej vitesh këtë rajon drejt Mbretërisë së Bashkuar, projekte që janë vlerësuar rreth 8 milion paund.

/RTSH/