Ambasadorja zvicerane: Mbështesim demokracinë dhe zhvillimin vendor në Shqipëri

Ambasadorja e Zvicrës në Shqipëri, Ruth Huber, deklaroi se vendi i saj vijon të mbështesë Shqipërinë në fusha të ndryshme të zhvillimit, duke përfshirë forcimin e qeverisjes vendore, shëndetësinë, eficiencën e energjisë, shërbimet sociale, si dhe arsimin dhe formimin profesional.

Sipas saj, bashkëpunimi zviceran shtrihet si në nivel lokal, ashtu edhe në atë kombëtar. Huber theksoi se Zvicra mbështet funksionimin e institucioneve demokratike në Shqipëri, përmes mbështetjes për Parlamentin, këshillat bashkiakë dhe organizatat e shoqërisë civile.

“Të gjitha këto janë instrumente të rëndësishme për funksionimin e demokracisë, ku qytetarët mund të shprehin shqetësimet e tyre. Njëkohësisht, është e domosdoshme të ketë institucione të forta dhe funksionale”, tha ajo.

E pyetur nëse protestat e fundit mund të ndikojnë në procesin e integrimit të Shqipërisë në Bashkimin Evropian, ambasadorja nënvizoi se Zvicra nuk është vend anëtar i BE-së dhe për këtë arsye nuk mund të mbajë një qëndrim mbi këtë çështje.