ANALIZË – Nga fusha e betejës te drejtimi i ushtrisë, sfidat e mëdha të gjeneralit të ri të Ukrainës

– Gjenerali i ri i Ukrainës, Mykhailo Drapatyi, përballet me një sërë sfidash të mëdha në një moment kritik të luftës me Rusinë mungesën e ushtarëve, nevojën për reforma në strukturën komanduese dhe garën teknologjike në luftën me dronë, sipas “Reuters”.

Drapatyi, 43 vjeç, u emërua nga presidenti Volodymyr Zelensky në krye të ushtrisë ukrainase, duke zëvendësuar gjeneralin 60-vjeçar Oleksandr Syrskyi, i cili ishte kritikuar nga disa ushtarë, për një stil të ngurtë drejtimi që, sipas tyre, kishte shkaktuar humbje të mëdha.

Sfida kryesore: Mungesa e trupave

Një nga problemet më të mëdha që do të duhet të zgjidhë Drapatyi është mungesa e personelit ushtarak.

Gjatë kohës kur drejtonte Forcat Tokësore, ai fitoi njohuri të drejtpërdrejta mbi problemet e rekrutimit, një përvojë që pritet ta përdorë për të mbushur boshllëqet në radhët e ushtrisë.

Këto mungesa kanë ndihmuar Rusinë të avancojë ngadalë në disa zona të frontit.

Lufta hyn në një fazë të re

Emërimi i tij vjen në një periudhë tensionesh politike dhe sociale në Ukrainë, ndërsa vendi përpiqet të rifitojë avantazhin në vitin e pestë të luftës.

Ish-komandanti i përgjithshëm i ushtrisë, Valeriy Zaluzhnyi, aktualisht ambasador i Ukrainës në Londër, paralajmëroi se detyra e Drapatyi do të jetë shumë më e vështirë nga sa ai e imagjinon.

Reforma në ushtri dhe lufta me dronë

Presidenti Zelensky ka nisur një nga ristrukturimet më të mëdha ushtarake të viteve të fundit, ndërsa Ukraina intensifikon sulmet me rreze të gjatë kundër industrisë energjetike dhe logjistikës ruse.

Pavarësisht se përparimi rus është ngadalësuar këtë vit, trupat e Moskës vazhdojnë presionin në zona strategjike të lindjes së Ukrainës, veçanërisht në rajonin e Donetskut.

Ndërkohë, sulmet me raketa balistike ndaj qyteteve ukrainase, përfshirë Kievin, janë shtuar, ndërsa Ukraina përballet me mungesë të sistemeve të mbrojtjes ajrore të prodhuara nga SHBA-ja.

Reputacion për reforma dhe integritet

Drapatyi shihet nga mbështetësit e tij si një komandant që mund të sjellë ndryshim.

Ai ka kritikuar më parë kulturën e vjetër ushtarake, të trashëguar nga periudha sovjetike, duke e përshkruar atë si një sistem me “frikë, mungesë iniciative dhe abuzime”.

Ai dha dorëheqjen vitin e kaluar si komandant i Forcave Tokësore pas disa sulmeve vdekjeprurëse ruse ndaj bazave të trajnimit, një veprim, që disa analistë e panë si shenjë se ai ishte i gatshëm të merrte përgjegjësi.

Pritshmëri të mëdha, por pa zgjidhje të menjëhershme

Analistët paralajmërojnë se Drapatyi nuk mund të zgjidhë menjëherë problemet e ushtrisë.

Serhiy Prytula, një mbështetës i njohur i ushtrisë ukrainase, vlerësoi integritetin e tij, por tha se pritshmëritë ndaj tij janë shumë të larta.

“Problemi i mobilizimit nuk do të zgjidhet me një shkop magjik. Situata në front nuk do të stabilizohet automatikisht vetëm sepse Drapatyi u emërua”, tha ai. /