ANKARA – Rutte: Sulmet e SHBA-së ndaj Iranit absolutisht të nevojshme

ANKARA, 8 korrik /ATSH-DPA/ – Sekretari i përgjithshëm i NATO-s, Mark Rutte, mbështeti sulmet e ndërmarra gjatë natës nga forcat amerikane ndaj më shumë se 80 objektivave në Iran, duke i cilësuar ato si një përgjigje të domosdoshme ndaj veprimeve të Teheranit.

Duke folur sot në Ankara, në kuadër të samitit të NATO-s, Rutte tha se sulmet ishin “absolutisht të nevojshme”, pasi, sipas tij, Irani kishte shkelur armëpushimin me sulmet ndaj tre anijeve tregtare që po kalonin nëpër Ngushticën e Hormuzit.

“Kur ke një armëpushim dhe Irani e shkel atë, siç pamë me sulmet ndaj anijeve dje, është thelbësore që Shtetet e Bashkuara të Amerikës reagojnë me forcë”, deklaroi kreu i aleancës.

Rutte i bëri komentet përpara konsultimeve me liderët e 32 vendeve anëtare të NATO-s, ku merr pjesë edhe presidenti amerikan Donald Trump.

Ndërkohë, tensionet në rajon mbeten të larta.

Kuvajti raportoi se ishte objekt sulmi, ndërsa në Bahrain u aktivizuan sirenat e alarmit ajror, pasi mediat iraniane njoftuan se ushtria e Iranit kishte paralajmëruar më herët se do t’u përgjigjej goditjeve amerikane./ /Ad.Ab./ a.jor.