“Avengers: Endgame Encore” rikthehet në kinema më 25 shtator me poster të ri dhe pamje ekskluzive nga “Avengers: Doomsday”

Marvel ka zbuluar posterin e ri për “Avengers: Endgame Encore”, pak përpara rikthimit të filmit në kinema. Posteri, i ilustruar nga artisti @kazoomori, ribashkon gjashtë heronjtë origjinalë të Avengers – Iron Man (Robert Downey Jr.), Captain America (Chris Evans), Thor (Chris Hemsworth), Hulk (Mark Ruffalo), Black Widow (Scarlett Johansson) dhe Hawkeye (Jeremy Renner) – në një stil grafiko-artistik mbi një sfond me nuanca të kuqe dhe të zeza. Duke e shpërndarë posterin në X, studioja shkroi: “The end is only the beginning”.

Filmi i vitit 2019, me regji të Joe dhe Anthony Russo, rikthehet në sallat e kinemasë më 25 shtator 2026 me material shtesë: një hapje të re, skena të shtuara dhe një fund special. Kohëzgjatja e raportuar e versionit standard është 183 minuta e 3 sekonda.

Seancat standarde përmbajnë 1 minutë e 52 sekonda material shtesë, ndërsa versionet IMAX dhe Infinity Vision përmbajnë 5 minuta e 3 sekonda përmbajtje shtesë. Infinity Vision është një format premium me ekran të madh që ofron cilësi të përmirësuar të figurës dhe tingullit.

Lajmi më i rëndësishëm për fansat është se “Avengers: Endgame Encore” do të përfshijë një shikim ekskluziv të kapitullit të ardhshëm të MCU-së, “Avengers: Doomsday”, i planifikuar për 18 dhjetor 2026. Vëllezërit Russo u kanë bërë thirrje fansave ta shohin rishfaqjen përpara “Doomsday”: “Ka një lidhje shumë të fortë mes ‘Endgame’ dhe ‘Doomsday’. Dhe nëse e shikoni filmin në kinema, do të shihni pamje të reja që e ilustrojnë këtë lidhje për ju.”

Marvel po i mban nën petale detajet e pamjeve të reja, duke shtuar kuriozitetin për rikthimin e blockbusters në kinema.

Burimi: ComingSoon.net