Basha në Krujë: Bashkohuni në protestën e 16 shkurtit në Tiranë

Kryetari i PD-së Lulzim Basha ka vijuar turin e tij në  qytetin e  Krujës ku iu ka bërë thirrje krutanëve të bëhen pjesë e protestës së 16 shkurtit në Tiranë.

Pasi bashkëbisedoi me qytetarët, Basha tha se 1/3 e krutanëve janë larguar për faj të keqqeverisjes së Edi Ramës.

“Shembull më të mirë se Kruja për të folur për rezultatet pozitive të bashkimit, nuk ka. Të gjithë bashkë ju ftoj më 16 shkurt në Tiranë”, theksoi ai.

“Në Krujë nuk pashë një turist, një blerës të trokasë në dyqane. Ka vende me klimë shumë më të keqe se Shqipëria, ku sezoni turistik nuk pushon 12 muaj në vit. Ndërkohë që në Krujë mezi presin muajt e verës. Sezoni i kaluar ishte i mjeruar. Më thanë se 6-7 vite më parë, gjysma e klientelës ishte lokale, apo bashkëkombasit nga Kosova dhe diaspora. Gjysma të huaj si konsumatorë kryesorë. Sot, situata është krejt ndryshe. Jo vetëm që nuk ka turistë për 1/3 e popullsisë së Krujës ka ikur, shumica prej tyre të rinj”, tha Basha.