Belgjika do t’i dorëzojë Ukrainës tre avionë F-16 deri në fund të vitit, thotë Zelenski

Presidenti ukrainas Volodymyr Zelenski njoftoi të martën se Belgjika do t’i transferojë Ukrainës tre avionë luftarakë F-16 deri në fund të vitit, duke shënuar një hap të ri në forcimin e mbrojtjes ajrore të Kievit përballë intensifikimit të sulmeve ruse.

Njoftimin, Zelenski e bëri në rrjetin social X, ku shkroi: “Ka një marrëveshje të rëndësishme me Belgjikën për transferimin e tre avionëve F-16 deri në fund të këtij viti”, duke shtuar se procedura do të përshpejtohet (“We will work to receive these aircraft through an accelerated procedure”), sipas Reuters.

Presidenti ukrainas tha se Ukraina ka marrë tashmë dërgesa urgjente municionesh për F-16 nga Belgjika dhe nga aleatë të tjerë perëndimorë, përfshirë Spanjën. Avionët luftarakë F-16, të prodhuar në Shtetet e Bashkuara, janë bërë thelbësorë për mbrojtjen ajrore shumë-shtresore të Ukrainës — ata përdoren për të rrëzuar dronët Shahed dhe raketat cruise me të cilat Rusia sulmon qytetet ukrainase.

“Meqenëse Rusia e përshkallëzon agresionin çdo ditë, duhet të rrisim aftësitë tona për të rrëzuar objektivat ajrore dhe për të mbrojtur njerëzit tanë,” tha Zelenski.

Ai falënderoi Belgjikën, kryeministrin Bart De Wever dhe gjithë qeverinë për “hapat vendimtarë në mbështetje të Ukrainës”, në përgjigje të sulmeve brutale të Rusisë kundër jetëve civile.

Ukraina mori avionët e parë F-16 në korrik 2024 nga Danimarka dhe Holanda; sipas Defense Express, flota ukrainase ka arritur deri në rreth 39 avionë F-16 që nga qershori 2026. Belgjika, nga ana e saj, kishte premtuar më parë dorëzimin e 30 avionëve F-16 deri në vitin 2028.