Berisha: Fermeri shqiptar, i braktisur nga qeveria. Marrëveshjet e Ballkanit të Hapur dëmtuan prodhimin tonë

Kreu i Partisë Demokratike, Sali Berisha akuzoi qeverinë se ka braktisur fermerët shqiptarë, duke theksuar se marrëveshjet e Ballkanit të Hapur kanë dëmtuar rëndë prodhimin vendor bujqësor.

Në një deklaratë të mbajtur gjatë takimit me fermerë në Cërrik, Berisha u ndal në dy çështje kryesore: heqjen e subvencioneve për naftën dhe efektet negative të iniciativës së Ballkanit të Hapur.

“Fermeri shqiptar sot është fermer i braktisur, është fermer i dekurajuar, është fermer i dënuar nga prodhimet që vijnë pas hapjes së kufijve në Ballkanin e Hapur”, tha Berisha.

Ai kritikoi vendimin e qeverisë për heqjen e subvencioneve për naftën e fermerëve në periudhën e krizës së çmimeve të naftës, sidomos gjatë luftës në Ukrainë.

“Tani a mund t’i shtrojmë pyetjen vetes ne këtu? A nuk pati një krizë në çmimin e naftës gjatë luftës, Shtetet e Bashkuara me Iranin? Kudo ndikoi ajo. Dhe në çdo vend qeveritë ndihmën e parë tek fermerët, absolutisht në çdo vend. Gjermania dyfishoi subvencionin për naftën. Po çdo vend tjetër. Kurse ky në mënyrë më të pacipë, më cinike, deklaroi do ta heqim thatë”, u shpreh Berisha.

Ai shtoi se qeveria ka mashtruar opinionin publik duke pretenduar se në Europë nuk jepet më subvencion për naftën e fermerëve, ndërsa në realitet shumë vende evropiane e kanë ruajtur apo madje rritur atë.

Berisha akuzoi se kjo politikë synon të detyrojë fermerët të braktisin tokën:“Për t’jua bërë ju të pamundur të punoni tokën dhe të ikni.”

Berisha e konsideroi Ballkanin e Hapur si një “akt armiqësor” ndaj bujqësisë shqiptare. Ai tha se kjo nismë ka lejuar vërshimin e produkteve bujqësore nga Serbia, e cila subvencionon fermerët e saj në një shkallë shumë më të lartë.

“Ballkani i Hapur… ishte një akt armiqësor ndaj jush. Sepse hapi dyert në të katër anët për vërshimin e prodhimeve bujqësore të shumadijes të Serbisë, vend i cili subvencionin ndaj fermerëve… e ka patur 8 herë më të madh se ç’e keni ju sot”, tha Berisha.

Ai përmendi edhe avantazhet e tjera të Serbisë si sistemet moderne të vaditjes, duke kontrastuar me situatën në Shqipëri.

Sipas tij, pas hapjes së kufijve kanë ndodhur “therje masive e lopëve, e të imtave, qumështi pluhur vërshoi” dhe prodhimet vendase mbetën pa treg.

Berisha premtoi se një nga aktet e para të një qeverie të re do të jetë anulimi përfundimtar i çdo akti të Ballkanit të Hapur.

“Sot jam këtu për t’ju zotuar se një nga aktet e para, anulimi përfundimtar i çdo akti të Ballkanit të Hapur. Po!”, deklaroi ai.

Ai kritikoi gjithashtu mungesën e investimeve në zonat rurale: “Çfarë investimesh janë bërë në Shqipërinë rurale? Pothuajse zero. Në zonat bujqësore, në fshatra, i ndërpreu.”