BRUKSEL – Von der Leyen dënon krizën në Ceuta: Kalimet e paligjshme duhet të ndalen, BE do të mbështesë Spanjën

– Presidentja e Komisionit Evropian, Ursula von der Leyen i ka cilësuar si “të papranueshme” pamjet nga enklava spanjolle e Ceutës, ku dhjetëra mijëra emigrantë hynë brenda një dite, duke theksuar se kalime të tilla nuk mund të lejohen jashtë rregullave të Bashkimit Evropian, sipas “Financial Times”.

Ajo kërkoi ndalimin e menjëhershëm të kalimeve të rrezikshme, goditjen e rrjeteve të trafikimit të qenieve njerëzore dhe zbatimin e shpejtë të procedurave të kthimit të emigrantëve, në përputhje me legjislacionin evropian.

Von der Leyen njoftoi gjithashtu se ka ngarkuar komisionerin për Çështjet e Brendshme, Magnus Brunner, dhe komisioneren për Mesdheun, Dubravka Šuica, të mbështesin autoritetet spanjolle në menaxhimin e situatës në terren, përfshirë përmes Agjencisë Evropiane të Rojës Kufitare dhe Bregdetare, “Frontex”.

Presidentja e Komisionit Evropian, vlerësoi gjithashtu bashkëpunimin me Marokun, duke bërë të ditur se komisionerja Šuica është në kontakt të drejtpërdrejtë me autoritetet marokene, për koordinimin e përgjigjes ndaj krizës.

“Jam e bindur se partneriteti ynë i ngushtë me Marokun do të ndihmojë në arritjen e rezultateve konkrete”, deklaroi Von der Leyen.

Qëndrimi i saj është në të njëjtën linjë me atë të qeverisë spanjolle, e cila ka vlerësuar bashkëpunimin e autoriteteve marokene, në përpjekjet për menaxhimin e krizës migratore në Ceuta. /