Buxheti 2027 për arsimin, Osmani: 1.03 miliardë euro për katër shtylla, laboratorë në të gjitha shkollat deri në 2028

Zëvendësministrja e Arsimit, Orjana Osmani, e ftuar në emisionin “Studio Live”, e cilësoi buxhetin e vitit 2027 për arsimin si një buxhet historik, siç njofton Shqiptarja.com. Sipas saj, fondi prej 1.03 miliardë eurosh do të shpërndahet në katër shtylla kryesore: arsimin parauniversitar, arsimin e lartë, kërkimin shkencor dhe infrastrukturën.

Osmani u shpreh se ky buxhet synon t’u përgjigjet nevojave të qytetarëve, mësuesve dhe pedagogëve, duke vendosur në qendër cilësinë në arsim. Ajo theksoi se buxheti është i dedikuar për arsimin dhe se shpërndarja e tij nuk shkon vetëm te pagat apo vetëm te elementet e zakonshme për çdo vit.

Sa i përket arsimit parauniversitar, Osmani bëri me dije se aktualisht 316 shkolla janë pajisur me Smart Lab, pra me laboratorët e fundit. Synimi është që deri në vitin 2028 të gjitha shkollat të jenë të pajisura me laboratorë.

Kërkimi shkencor ka një buxhet të dedikuar, ndërsa aktualisht janë miratuar 86 projekte që do të financohen nga Ministria e Arsimit.