Danimarka përshpejton paketën 276 milionë dollarëshe për mbrojtjen ajrore të Ukrainës pas incidentit me fregatën ruse

KOPENHAGA – Danimarka po përshpejton një paketë të re ndihme ushtarake për Ukrainën me vlerë rreth 1.8 miliardë korona daneze (rreth 276 milionë dollarë), e cila do të shkojë kryesisht për mbrojtjen ajrore të Kievit. Vendimi vjen disa ditë pas një incidenti në Detin Baltik, ku një fregatë ruse hodhi pa paralajmërim sinjalizues drejt një helikopteri ushtarak danez.

Të hënën, fregata ruse lëshoi dy sinjalizues (flares) drejt helikopterit danez Fennec, i cili po fotografonte anijen në ujëra ndërkombëtare në jug të Gedserit. Njëri nga sinjalizuesit kaloi shumë pranë helikopterit, por nuk pati të lënduar apo dëme materiale. Autoritetet daneze e kanë cilësuar veprimin si “qëllimisht provokues”.

“Nëse rusët mendojnë se mund të na trondisin, atëherë përgjigjja jonë është ta rrisim mbështetjen për Ukrainën më shpejt nga sa kishim planifikuar”, deklaroi ministri danez i Mbrojtjes, Jeppe Bruus.

Edhe ministri i Jashtëm Lars Løkke Rasmussen ishte i prerë: “Nëse dikush mendon se mund të na bëjë presion që të tërhiqemi nga mbështetja për Ukrainën, gabon.”

Danimarka thirri ambasadorin rus në Kopenhagë për shpjegime mbi incidentin, ndërkohë që Moska e akuzoi Danimarkën për manovra të rrezikshme në det.

Danimarka është ndër mbështetëset më të zëshme të Ukrainës që nga fillimi i pushtimit rus në vitin 2022 dhe renditet si udhëheqëse për frymë popullsie në dhënien e ndihmës ushtarake për Kievin.

Burimi: Reuters