Demokrati Heinrich bllokon në Senat projektligjin bipartizan për kostot e energjisë së qendrave të të dhënave

Një demokrat i vetëm në Senat bllokoi një projektligj bipartizan që do të mbronte konsumatorët e energjisë nga kostot e qendrave të të dhënave të Inteligjencës Artificiale, vetëm një ditë pasi Dhoma e Përfaqësuesve e miratoi me shumicë dërrmuese 417-3.

Është fjala për “Ratepayer Protection Act”, masën që synonte të urdhëronte shtetet të merrnin në konsideratë standarde për të ndaluar shfrytëzuesit e mëdhenj të energjisë — si qendrat e të dhënave të IA-së — që t’ia kalonin kostot e ndërtimit të rrjetit elektrik klientëve të zakonshëm. Senatori republikan Jon Husted (Ohio) u përpoq ta kalonte me procedurë të përshpejtuar, por hasi në kundërshtimin e kolegut demokrat Martin Heinrich (New Mexico).

Heinrich argumentoi se projektligji “nuk shkon mjaft larg”. Në vend të tij, ai propozoi “GRID Savings Act”-in e tij, i cili do t’u kërkonte shfrytëzuesve të mëdhenj të paguanin vetë për lidhjet me rrjetin elektrik. Por edhe kjo masë u kundërshtua — nga senatori republikan Bernie Moreno (Ohio) — duke i lënë të dy projektligjet pezull.

Përkrahësit e masës theksojnë se është e padrejtë që faturat e familjeve të zakonshme të rëndohen me kostot e infrastrukturës që shërben kompanive gjigante të teknologjisë, ndërsa kritikët, si Heinrich, thonë se mbrojtja e konsumatorëve duhet të jetë më e fortë dhe më e drejtpërdrejtë.

Qendrat e të dhënave për IA-në janë kthyer në një temë të nxehtë politike para zgjedhjeve të mesmandatit të nëntorit. Vetë Husted përballet me një garë të vështirë rizgjedhjeje kundër ish-senatorit demokrat Sherrod Brown.

Senati do të qëndrojë në seancë deri në fund të muajit, pastaj niset për pushim deri pas zgjedhjeve të mesmandatit — duke lënë pak hapësirë që çështja të zgjidhet para votimit.

Burimi: New York Post