Detaje të reja nga krimi në Livoç: 30-vjeçarja mori tetë plumba, i plagosuri në gjendje kritike në QKUK

Zëdhënësi i Policisë së Kosovës në rajonin e Gjilanit, Ismet Hashani, bëri të ditur se i dyshuari për vrasjen e dyfishtë në Livoç të Ulët është vetëdorëzuar në Stacionin e Policisë pak minuta pas rastit tragjik, siç njofton KosovaPress.

Të premten rreth orës 14:25 policia u njoftua për të shtëna me armë zjarri në fshatin Livoç i Ulët, ku si pasojë mbetën të vdekur një 30-vjeçare së bashku me vëllain e saj, ndërsa një person i tretë u plagos rëndë, sipas KosovaPress.

Motivet e rastit ende nuk dihen; forenzika, hetuesit dhe prokurori i shtetit dolën në vendin e ngjarjes. Pas vetëdorëzimit, i dyshuari u intervistua në prani të avokatit mbrojtës.

Mjeku Suat Haliti nga Spitali i Gjilanit bëri të ditur se 30-vjeçarja kishte tetë plumba në trup, ndërsa i plagosuri ka qenë në gjendje të rëndë kritike dhe është mbajtur me doza gjaku para dërgimit në QKUK.

Drejtori i Emergjencës në QKUK, Naser Syla, konfirmoi se i plagosuri pas ekzaminimeve u dërgua në sallën operative, ku u përkujdesën ekipet e kirurgjisë abdominale, urologjisë dhe anestezionit, dhe pas operacionit u transferua në mjekimin intensiv qendror.

Sipas informatave, burri vrau gruan dhe vëllain e saj, ndërsa xhaxhai i gruas po trajtohet në QKUK. Gjatë veprimeve policore u sekuestrua një armë zjarri që dyshohet se u përdor në rast. Policia, në koordinim me Prokurorin e Shtetit, po ndërmerr veprimet hetimore për sqarimin e plotë të rrethanave dhe përcaktimin e motivit.