Do të hedh në erë Messi-n! Zbulohet plani për një atentat ndaj yllit argjentinas në Botëror

Një raport i policisë amerikane zbulon detajet në lidhje me rreziqet e evidentuara nga FBI dhe forcat e rendit gjatë Kupës së Botës 2026.

Prapaskenat mbi sigurinë e Botërorit të fundit flasin për një pamje të errët pas kuintave të turneut të madh të futbollit. Sipas të përditshmes spanjolle “Marca”, një raport i policisë amerikane zbulon detajet në lidhje me ndërhyrjet e kryera nga FBI dhe IPCC për neutralizimin e kërcënimeve me rrezik të lartë ndaj lojtarëve dhe arbitrave.

Futbollisti më i shënjestruar ka qenë Lionel Messi. Para sfidës në fazën e grupeve mes Argjentinës dhe Jordanisë, një telefonatë në aeroportin e Dallas-it ka shkaktuar alarm të kuq. Një burrë ka kërcënuar se do të futej në stadium me dy bashkëpunëtorë, i armatosur me një pushkë AR-15 dhe bomba artizanale. Ai ka bërë me dije qartazi se shënjestra ishte Messi.

Një tjetër alarm ka pasur para ndeshjes Argjentinë-Egjipt, ku një i dyshuar ka publikuar në rrjetet sociale mesazhin: “Do të hyj në ‘Atlanta Stadium’ dhe do të hedh në erë Messi-n me 4 bomba të lidhura në trup”. Gjatë së njëjtës ndeshje një telefonatë anonime ka njoftuar për lëndë shpërthyese të shfeshur në koshat e pehërave në tribuna. Pas ndërhyrjes nga forcat e rendit, është vërtetuar se ishte një alarm fals.

Jo vetëm Messi, edhe Cristiano Ronaldo është përfshirë në këto rreziqe. FIFA ka lajmëruar FBI-në për praninë e një personi të dyshimtë, duke kërkuar informacione të rezervuara në lidhje me hotelin e kombëtares portugeze. Personi është identifikuar dhe arrestuar 2 ditë më pas nga policia e Houston pikërisht në hotelin, ku ishte akomoduar Portugalia.

Në Toronto pati një episod të dytë: një individ është ndaluar teksa tentonte të futej në ashensorin e rezervuar për Cristiano Ronaldo-n, duke u justifikuar më pas se donte vetëm të bënte një ‘selfie’ me idhullin e tij.

Një çmim të lartë për sigurinë kanë paguar edhe arbitrat. Francezi François Letexier, në qendër të polemikave pasi gjykoi ndeshjen Argjentinë-Egjipt, ka marrë më shumë se 6000 mesazhe urrejtjeje dhe kërcënimesh me vdekje në numrin e tij personal në WhatsApp. Të njëjtin fat pati edhe kolegu Willy Delajod, i impenjuar në VAR për këtë ndeshje.

Këto kërcënime detyruan autoritetet franceze të marrin masa, duke vendosur një mbrojtje speciale për sigurinë e banesave dhe familjeve të tyre.