Dyshimet për një dron mbyllën aeroportin e Vilniusit, Lituania sqaron se çfarë kapi radari që alarmoi vendin

Lituania ka reaguar duke sqaruar se alarmi për një dron të dyshuar në hapësirën e saj ajrore që i shtyu autoritetet të mbyllnin aeroportin e Vilniusit dhe NATO-n të thërriste të paktën një avion luftarak, rezultoi të ishte një tufë zogjsh.

Alarmi ajror u hoq dhe aeroporti u rihap brenda 38 minutash, pasi avioni i NATO-s bëri një identifikim vizual, tha Qendra Kombëtare e Menaxhimit të Krizave e Lituanisë.

“Në leximet fillestare të radarit, gjurmët e lëna nga zogjtë dhe dronët mund të jenë të ngjashme”, shtoi ajo në një deklaratë.

Një avion ishte thirrur nga Siauliai në Lituaninë veriore, tha qendra, ku aktualisht ndodhen forcat ajrore italiane si pjesë e misionit të Mbrojtjes Ajrore Baltike të NATO-s.

Dronët ushtarakë që enden jashtë hapësirës ajrore të Finlandës, Estonisë, Letonisë dhe Lituanisë po ngjallin shqetësime se lufta në Ukrainë po përhapet në kufijtë veriorë të NATO-s me Rusinë.