FOKUS – Carney: Kanadaja do të mbetet partneri më i rëndësishëm i SHBA-së, pavarësisht luftës tregtare

– Kryeministri kanadez Mark Carney ka deklaruar se Kanadaja do të vazhdojë të jetë një partner kyç i Shteteve të Bashkuara, pavarësisht tensioneve të krijuara nga lufta tregtare mes dy vendeve, shkruan euronews.com.

Duke folur të martën në Canada Investment Summit në Toronto, Carney iu drejtua drejtpërdrejt Shteteve të Bashkuara, duke theksuar rëndësinë e marrëdhënieve të përbashkëta.

“Miqve tanë amerikanë dua t’u them këtë: Ne do të jemi gjithmonë fqinjë të afërt dhe Kanadaja do të vazhdojë të jetë partneri më i rëndësishëm i Shteteve të Bashkuara në shumë sektorë kyç”, deklaroi Carney.

Ai shtoi se edhe në periudhat kur dy vendet kanë pasur mosmarrëveshje, lidhjet mes tyre kanë mbetur të forta.

“Edhe në momentet e divergjencave, gjatë historisë sonë të gjatë të përbashkët, ne kemi ruajtur gjithmonë lidhje të thella”, tha kryeministri kanadez.

Carney theksoi gjithashtu se Kanadaja synon të jetë në të ardhmen “një partner edhe më i mirë” për Shtetet e Bashkuara, duke u fokusuar në forcimin e ekonomisë dhe sigurisë.

“Më e fortë, më elastike, më e pavarur dhe e gatshme të çojë përpara interesat tona të përbashkëta ekonomike dhe të sigurisë”, u shpreh ai.

Deklaratat vijnë në një periudhë tensionesh të shtuara tregtare mes Otavës dhe Uashingtonit, të cilat kanë ndikuar në marrëdhëniet ekonomike dhe politike mes dy vendeve.