FOKUS – Franca kërkon 30 miliardë euro kursime, Lecornu shqyrton uljen e pagave të ministrave

– Kryeministri francez Sébastien Lecornu përballet me një sfidë të rëndësishme në përgatitjen e projektbuxhetit për vitin 2027: gjetjen e rreth 30 miliardë eurove kursime për të reduktuar deficitin dhe borxhin publik, shkruan Euronews.com.

Çështja ishte në qendër të një seminari qeveritar të zhvilluar këtë të enjte, ndërsa qeveria po shqyrton disa masa për uljen e shpenzimeve.

Ndër propozimet në diskutim janë kursimet në pensione, ulja e kontributit të jashtëzakonshëm të kompanive të mëdha dhe vendosja e taksave mbi kursimet e punonjësve.

Sipas BFMTV, një tjetër masë që po shqyrtohet është ulja e pagave të ministrave dhe këshilltarëve të kabineteve ministrore, si dhe një reduktim prej 10% i kompensimeve për deputetët dhe senatorët.

Megjithatë, kjo e fundit është kompetencë e Parlamentit, sipas rrethit të kryeministrit Lecornu.

Aktualisht, kryeministri francez merr 16.038 euro bruto në muaj, ndërsa secili prej 36 ministrave të qeverisë merr 10.692 euro bruto në muaj.

Pagesa përfshin pagën bazë, kompensimin e banimit dhe kompensimin e funksionit.

Një ulje e pagave do ta afronte Lecornun me vendimin e marrë nga ish-presidenti François Hollande në vitin 2012. Hollande uli me 30% kompensimet e tij dhe të ministrave të qeverisë së tij.

Ekonomisti Pascal de Lima sugjeron që, përveç pagave, të shqyrtohen edhe numri i ministrave, madhësia e kabineteve, automjetet zyrtare, udhëtimet, banesat e shërbimit dhe strukturat mbështetëse.

Ai paralajmëron, megjithatë, se jo të gjitha këto shpenzime duhet të konsiderohen privilegje, pasi disa lidhen me sigurinë dhe funksionimin normal të qeverisë.

Në krahasim me vende të tjera evropiane, ministrat francezë, me rreth 11 mijë euro bruto në muaj, kanë paga më të larta se homologët e tyre në Itali, Portugali dhe Spanjë, ndërsa ministrat e Danimarkës dhe Gjermanisë marrin paga dukshëm më të larta.