FOKUS – Kina u bën thirrje BRICS-it dhe vendeve partnere t’i mbajnë zinxhirët e furnizimit “të qëndrueshëm dhe të papenguar”

NJU DELHI, Presidenti kinez, Xi Jinping, u ka bërë thirrje anëtarëve të zgjeruar të BRICS-it dhe vendeve partnere që t’i mbajnë zinxhirët industrial dhe të furnizimit “të qëndrueshëm dhe të papenguar”, mes ndërprerjeve të transportit detar përmes Ngushticës së Hormuzit për shkak të luftës SHBA-Iran,.

Sipas agjencisë shtetërore të lajmeve Xinhua, Xi tha se “BRICS-i i zgjeruar” duhet të vendosë një “themel të fortë” për bashkëpunimin praktik gjatë ditës së fundit të Samitit të 18-të dyditor të Liderëve të BRICS-it në New Delhi.

Ai foli në një seancë të hapur me titull “Qëndrueshmëria, Inovacioni, Bashkëpunimi dhe Qëndrueshmëria: Formësimi i së ardhmes për rritje globale gjithëpërfshirëse”.

Presidenti kinez tha se Jugu Global është bërë një “forcë kyçe që e çon botën drejt multipolaritetit” dhe u bëri thirrje vendeve të mbështesin multilateralizmin.

Ai gjithashtu tha se vendet e Jugut Global duhet të “mbështesin autoritetin dhe rolin e OKB-së” dhe të përkrahin reformat për përmirësimin e efikasitetit të institucioneve multilaterale.

Xi bëri thirrje për përmirësimin e arkitekturës financiare ndërkombëtare, rritjen e përfaqësimit dhe të rolit të vendeve në zhvillim në vendimmarrje, si dhe për reformimin e OBT-së në “drejtimin e duhur”.

Presidenti kinez gjithashtu i bëri thirrje “BRICS-it të zgjeruar” të modernizojë industritë tradicionale, të zhvillojë sektorët në zhvillim dhe të hartojë plane largpamëse për industritë e së ardhmes, të nxisë tregjet e integruara dhe të “vendosë një themel të fortë për bashkëpunimin praktik”.

Ai gjithashtu propozoi iniciativa për zhvillimin e talenteve në shkencë dhe teknologji, prodhimin inteligjent, industrinë digjitale, lehtësimin e tregtisë dhe investimeve, si dhe inteligjencën artificiale (IA) “të hapur dhe gjithëpërfshirëse”.