FOKUS – Lukashenko liron 25 të burgosur, ndërsa SHBA njofton heqjen e sanksioneve ndaj dy kompanive bjelloruse

MINSK, 16 tetor / ATSH – DPA/ – Presidenti bjellorus Alexander Lukashenko ka liruar 25 të burgosur, ndërsa Shtetet e Bashkuara kanë njoftuar heqjen e sanksioneve ndaj dy kompanive bjelloruse.

Lajmi u bë i ditur të mërkurën nga negociatori amerikan John Coale, pas bisedimeve në Minsk
“25 të burgosur janë të lirë sot.

Angazhimi i presidentit Trump për diplomacinë e drejtpërdrejtë sjell rezultate”, shkroi Coale në rrjetin social X, duke falënderuar Lukashenkon për lirimet.

Ai shtoi se SHBA-ja do të vazhdojë të punojë për përmirësimin e marrëdhënieve me Bjellorusinë dhe për lirimin e personave të tjerë në të ardhmen e afërt.

Në një deklaratë të transmetuar nga televizioni shtetëror bjellorus, Coale tha se Uashingtoni do të heqë sanksionet ndaj dy kompanive:

Bellesbumprom, kompani e përpunimit të drurit që prodhon edhe letër, dhe Lakokraska, prodhuesi më i madh bjellorus i bojrave, llakëve dhe veshjeve kundër korrozionit.

Sanksionet e Bashkimit Evropian ndaj Bjellorusisë do të mbeten në fuqi.
Liderja e opozitës bjelloruse në mërgim, Sviatlana Tsikhanouskaya, përshëndeti përpjekjet humanitare të SHBA-së.

“Çdo person i liruar është një fitore”, shkroi ajo në Telegram, duke theksuar se puna duhet të vazhdojë deri në lirimin e të gjithë të burgosurve politikë.

Tsikhanouskaya tha gjithashtu se opozita në mërgim do të ndihmojë personat që janë larguar nga Bjellorusia të rindërtojnë jetën e tyre jashtë vendit pas viteve të burgimit.

Burri i saj, Sergei Tsikhanouski, ishte liruar më herët në kuadër të një nisme tjetër për lirimin e të burgosurve.