FOKUS – Metsola: Australia dhe Zelanda e Re mund të ndjekin Kanadanë drejt anëtarësimit të asociuar në BE

– Presidentja e Parlamentit Evropian, Roberta Metsola, deklaroi se Australia dhe Zelanda e Re mund të jenë ndër vendet që do të ndjekin Kanadanë në një status të mundshëm të “anëtarit të asociuar” të Bashkimit Evropian, shkruan Euronews.com.

Në një intervistë për Euronews, Metsola tha se propozimi për një anëtarësim të asociuar të Kanadasë mund të forcojë bashkëpunimin e BE-së me vendet që ndajnë vlera dhe interesa të ngjashme.

Sipas saj, statusi i propozuar do të përfaqësonte një rrugë të tretë mes anëtarësimit të plotë në BE dhe statusit të vendit kandidat.

“Ka vende me të cilat duam të thellojmë marrëdhëniet tona”, tha Metsola, duke shtuar se mund të ketë edhe vende të tjera që do të kërkojnë një lidhje më të ngushtë me Bashkimin Evropian.

“Në kohë pasigurie si këto, të kesh miq është e rëndësishme”, u shpreh ajo.

BE-ja ka tashmë marrëveshje tregtare me Australinë dhe Zelandën e Re, ndërsa me Kanadanë ka në fuqi marrëveshjen gjithëpërfshirëse ekonomike dhe tregtare CETA, e nënshkruar në vitin 2016. Këto marrëdhënie mund të shërbejnë si bazë për një bashkëpunim edhe më të gjerë.

Metsola theksoi se detajet e statusit të anëtarësimit të asociuar janë ende në fazat fillestare të diskutimit. Mes fushave që mund të përfshihen janë marrëdhëniet tregtare, qasja në lëndët e para kritike dhe rregulla të përbashkëta për çështje si rrjetet sociale dhe mbrojtja e të miturve.

Presidentja e Komisionit Evropian, Ursula von der Leyen, propozoi të mërkurën që Kanadaja të bëhet anëtari i parë i asociuar i BE-së, gjatë fjalimit të saj për Gjendjen e Bashkimit Evropian. Propozimi parashikon gjithashtu forcimin e bashkëpunimit në teknologji, mbrojtje, energji, minerale kritike, inteligjencë artificiale dhe siguri ekonomike.

Kryeministri kanadez Mark Carney, i cili foli sot në Parlamentin Evropian në Strasburg, ka mirëpritur propozimin, duke theksuar se Kanadaja kërkon një marrëdhënie më të ngushtë me BE-në, por jo anëtarësim të plotë në Union.