FOKUS – Radev: Evropa të angazhohet në dialog me Rusinë për t’i dhënë fund luftës në Ukrainë

SOFJE, 30 shtator /ATSH-AFP/ – Evropa duhet të nisë dialogun me Rusinë për t’i dhënë fund luftës në Ukrainë, duke marrë parasysh edhe rrezikun e një përshkallëzimi bërthamor, deklaroi të mërkurën në Bruksel kryeministri bullgar Roumen Radev.

“Duhet të fillojmë të flasim me Rusinë. Prioriteti ynë kryesor duhet të jetë dialogu dhe puna për paqen”, tha Radev gjatë një konference.

Sipas tij, mbështetja ushtarake për Ukrainën nuk është e mjaftueshme, veçanërisht në një kohë kur Kievi po përballet me vështirësi në mbrojtjen e territorit të tij nga sulmet ajrore ruse.

“Duhet të kuptojmë se ekziston një kufi për mbështetjen që mund të ofrohet vetëm përmes dërgimit të armëve. Paqja përfundimtare do të arrihet përmes diplomacisë, jo përmes furnizimit me armë”, u shpreh kryeministri bullgar.

Radev theksoi gjithashtu nevojën që vendet evropiane të marrin në konsideratë rrezikun bërthamor gjatë përballjes me Rusinë.
“Deri në çfarë mase mund të ushtrojmë presion mbi Rusinë pa shkaktuar një reagim tjetër nga ana e saj?”, pyeti ai, duke shtuar se sa herë Moska ndihet e dobët, “rikthen në skenë kartën bërthamore”.

Deklaratat e kryeministrit bullgar vijnë në një periudhë tensionesh të shtuara mes Rusisë dhe NATO-s.

Aleanca e Atlantikut të Veriut ka dënuar së fundmi atë që e cilësoi si “retorikë të papërgjegjshme bërthamore” nga Moska, në një dokument ku Rusia akuzonte NATO-n për “provokime” në lidhje me enklavën ruse të Kaliningradit.