FOKUS – SHBA-ja dhe Irani drejt marrëveshjes për Ngushticën e Hormuzit

– Irani dhe Shtetet e Bashkuara të Amerikës janë drejt një marrëveshjeje për rihapjen e Ngushticës së Hormuzit, një nga rrugët më të rëndësishme detare për transportin global të naftës dhe gazit, sipas AP.

Irani tha se drafti i marrëveshjes me ndërmjetësimin e Omanit është në fazën përfundimtare, ndërsa presidenti amerikan Donald Trump deklaroi se një marrëveshje mund të shpallet brenda pak ditësh.

Marrëveshja pritet të jetë e vështirë, pasi, Irani kërkon të ruajë një formë kontrolli mbi ngushticën dhe nuk pranon kthimin e saj si një rrugë plotësisht të hapur ndërkombëtare.

Ndërsa SHBA-ja kundërshton çdo marrëveshje që i jep Iranit kontroll ose mundësi tarifimi mbi trafikun detar.

Një marrëveshje e përkohshme mund të lejojë rifillimin e qarkullimit të anijeve dhe të ulë presionin mbi ekonominë globale.

Mbyllja e ngushticës ka rritur çmimet e karburanteve dhe mallrave bazë, pasi përmes saj kalonte rreth një e pesta e naftës dhe gazit të tregtuar në botë.

Sipas zyrtarëve rajonalë, drafti është përgatitur nga negociatorët iranianë dhe omanë dhe pritet miratimi përfundimtar nga udhëheqja iraniane.

Marrëveshja mund të hapë rrugën edhe për rifillimin e bisedimeve për programin bërthamor të Iranit.

Ndërkohë, tensionet në rajon vazhdojnë. Rebelët Houthi në Jemen, pretenduan se kanë sulmuar me raketa anijet saudite në Detin e Kuq, ndërsa armëpushimi mes Izraelit dhe Hezbollahut në Liban, po bëhet gjithnjë e më i brishtë pas përplasjeve të reja. /