GJERMANI – AfD-ja kryeson, ndërsa CDU/CSU bie në nivel rekord të ulët

BERRLIN, 15 shtator /ATSH-DPA/- Partia e ekstremit të djathtë, Alternativa për Gjermaninë (AfD), vazhdon të kryesojë në sondazhet e opinionit në vend, sipas një studimi të publikuar sot nga YouGov.

Rezultati vjen pas fitores së thellë të partisë në landin lindor të Saksonisë-Anhaltit në fillim të këtij muaji.

Në sondazhin e zhvilluar nga e premtja deri të hënën, AfD-ja siguroi 29% të mbështetjes, një pikë përqindjeje më shumë se në gusht. Kjo e pozicionon atë si forcën kryesore politike në Gjermani.

Në krahun tjetër, aleanca konservatore CDU/CSU ka shënuar një rënie të ndjeshme.

Partia Kristiandemokrate (CDU) dhe partia simotër bavareze, CSU, kanë zbritur në 18%, niveli më i ulët i regjistruar ndonjëherë në këtë seri sondazhesh, me një rënie prej dy pikësh.

Të Gjelbrit kanë rritur mbështetjen me një pikë, duke arritur në 16%.

Socialdemokratët (SPD), partneri i vogël në koalicionin qeverisës me konservatorët e kancelarit Friedrich Merz, kanë fituar gjithashtu një pikë dhe tani renditen në 13%.

Partia e Majtë ka humbur dy pikë, duke zbritur në 10%.

Ndërkohë, liberalët e FDP-së mbeten në 5%, ndërsa Aleanca Sahra Wagenknecht (BSW), një forcë populiste, është rritur në 4%.

Sondazhi tregon se shumica e qytetarëve vazhdojnë ta konsiderojnë AfD-në një parti të ekstremit të djathtë. 59% e të anketuarve ndajnë këtë qëndrim, ndërsa 30% nuk janë dakord.

Kjo shifër ka mbetur pothuajse e pandryshuar që nga maji i vitit 2025.

Megjithatë, qëndrimi ndaj të ashtuquajturës “mur mbrojtës” politik ka ndryshuar. Ky term i referohet politikës së partive tradicionale për të mos bashkëpunuar me AfD-në.

Sipas sondazhit, 51% e të anketuarve mendojnë se partitë e tjera nuk duhet ta përjashtojnë kategorikisht bashkëpunimin me AfD-në. Në gusht, këtë qëndrim e mbështesnin 44% e të anketuarve.

Në të kundërt, 40% e pjesëmarrësve favorizojnë vazhdimin e përjashtimit të plotë të AfD-së nga bashkëpunimi politik, krahasuar me 46% një muaj më parë.

Rezultatet tregojnë se mbështetja për ruajtjen e barrierës politike ndaj AfD-së është dobësuar.