GJERMANI – Takim i fshehtë mes drejtuesve ushtarakë të SHBA-së, Izraelit dhe vendeve arabe për luftën me Iranin

– Drejtues të lartë ushtarakë nga Shtetet e Bashkuara të Amerikës, Izraeli dhe shtatë vende arabe zhvilluan javën e kaluar një takim të fshehtë në Gjermani, ku diskutuan luftën me Iranin dhe situatën e sigurisë në Lindjen e Mesme, raportoi “Axios”.

Takimi u organizua nga komandanti i Komandës Qendrore të SHBA-së (CENTCOM), admirali Brad Cooper.

Pjesëmarrësit përfshinin shefat e shtabeve të Izraelit, Arabisë Saudite, Emirateve të Bashkuara Arabe, Bahreinit, Kuvajtit, Katarit, Jordanisë dhe Egjiptit.

Takimi nuk ishte njoftuar publikisht nga qeveritë pjesëmarrëse.

CENTCOM konfirmoi më pas se kishte organizuar në Gjermani një konferencë të planifikuar me drejtues të lartë ushtarakë nga tetë vende, ku u diskutuan mundësitë për forcimin e bashkëpunimit në fushën e sigurisë në Lindjen e Mesme.

Sipas raportimit të “Axios”, diskutimet u përqendruan te lufta me Iranin dhe tensionet më të gjera rajonale.

Komandanti i CENTCOM, Cooper, u përcolli pjesëmarrësve mesazhin se Shtetet e Bashkuara të Amerikës nuk planifikojnë të tërhiqen nga rajoni, pavarësisht sulmeve iraniane ndaj bazave amerikane në Lindjen e Mesme.

Në takim mori pjesë edhe shefi i Shtabit të Përgjithshëm të ushtrisë izraelite, gjenerallejtënant Eyal Zamir.

Sipas burimeve izraelite të cituara nga “Axios”, Zamir informoi drejtuesit ushtarakë arabë për operacionet e Izraelit në fronte të ndryshme.

Takimi përbën një rast të rrallë të komunikimit të drejtpërdrejtë në këtë nivel mes Izraelit dhe disa vendeve arabe.

Veçanërisht i rëndësishëm është fakti se në të morën pjesë edhe Arabia Saudite, Kuvajti dhe Katari, vende që nuk kanë marrëdhënie diplomatike me Izraelin.

Sipas raportimeve, në qendër të diskutimeve ishte gjithashtu situata e sigurisë në rajon, përfshirë kërcënimet që lidhen me Iranin, Ngushticën e Hormuzit dhe aktivitetin e rebelëve Houthi në Jemen dhe në zonën e Detit të Kuq.

Takimi nuk është paraqitur zyrtarisht si krijimi i një aleance të re ushtarake dhe nuk është bërë e ditur nëse pjesëmarrësit kanë arritur marrëveshje konkrete për operacione të përbashkëta.

CENTCOM e përshkroi takimin si një konferencë të planifikuar për forcimin e bashkëpunimit në fushën e sigurisë. /