Gjimshiti përshëndet Bergamon dhe Atalantën: Gjithmonë në zemër, më dhatë më shumë se futbolli!

“Sot fillon një kapitull i ri. Por ka vende që nuk i lë dot vërtet. Mund të lësh një skuadër, mund të lësh një qytet, por një shtëpi e mbajmë brenda nesh”.

Janë fjalët që shkruan në profilin e tij në Instagram, Berat Gjimshiti, mbrojtësi i Kombëtares shqiptare që u largua nga Atalanta për të kaluar tek Al-Diriya në Arabinë Saudite. Ai ka firmosur një kontratë dyvjeçare, me 3 milionë euro në sezon. Kapiteni kuqezi ka lënë Atalantën pas 334 ndeshjesh të luajtura.

Në postimin e tij, Gjimshiti përshkruan etapat e aventurës së tij me Atalantën: “Mbërrita në Bergamo 10 vite më parë si një lojtar i ri, me një ëndërr dhe shumë dëshirë për të treguar vlerat e mia. Sot largohem, duke e ditur se ky vend më ka dhënë më shumë se futbolli. Këtu u rrita si lojtar, si njeri dhe si baba. Këtu u rrit familja ime. Bergamo u bë shtëpi dhe Atalanta më shumë se një skuadër”.

Kulmi me fanellën e Atalantës për Gjimshtin ishte fitimi i Europa League 2 vjet më parë. “Këto vite kemi përjetuar fitore, humbje, netë të paharrueshme dhe arritje që ndoshta kohë më parë vetëm i ëndërronim. Ajo çfarë do të ruaj më shumë se çdo gjë tjetër janë njerëzit. Shokët e mi, trajnerët, gjithë stafet, çdo person që punon për këtë klub, familja Percassi, tifozët dhe gjithë qytetarët e Bergamos. Faleminderit për mbështetjen, që keni luftuar me ne dhe që më keni bërë mua dhe familjen time të ndihem pjesë e diçkaje speciale.

Asgjë nga ajo që kemi arritur nuk na është dhuruar. E kemi ndërtuar bashkë, me punë, sakrificë, disiplinë, zemër dhe atë mentalitet që bashkon thellësisht Atalantën me qytetin. Faleminderit për gjithçka, Bergamo. Faleminderit për gjithçka, Atalanta. Gjithmonë në zemër”, e mbyll postimin mbrojtësi shqiptar.