Gjykata lë në qeli 5 protestuesit e PD, Berisha: U lanë në burg pa prova dhe pa fakte

Kryetari i Partisë Demokratike, Sali Berisha, ka reaguar sot pas vendimit të Gjykatës së Tiranës për të lënë në “arrest me burg” pesë nga protestuesit e ndaluar të premten në mbrëmje gjatë tubimit të organizuar nga Partia Demokratike.

Sipas tij, të ndaluarit janë mbajtur në burg pa prova dhe pa fakte. Berisha shprehu mirënjohje për qytetarët që morën pjesë në protestë, duke e cilësuar atë si një “uragan të fuqishëm lirie”.

“Dua të shpreh mirënjohjen ndaj dhjetëra e mijëra qytetarëve që me uraganin e fuqishëm të lirisë të premten që shkoi, shndërruan zërin e shqiptarëve guximtarë në jehonën më të fuqishme botërore. Sonte unë kam një mirënjohje dhe përshëndetje shumë të përzemërt për heronjtë e kryengritjes paqësore të 17 prillit, Klement Çuçka, Bujar Tusha, Henri Shapllo, Mirvet Toçilla dhe Sem Bici,” u shpreh Berisha.

Berisha tha se “lirimi i tyre urgjent nga burgu do të jetë një nga betejat e Partisë Demokratike.”

Për herë të parë pas 7 protestash kombëtare, 5 nga 11 protestuesit e opozitës u lanë në qeli pas sulmeve me molotovë ndaj institucioneve dhe policisë. Vendimi u mor nga gjyqtari Enkel Peza, me kërkesë të Prokurorisë së Tiranës, pas arrestimit në flagrancë të protestuesve.