Gonxhja: Lirohen çadrat e vendosura në mënyrë të paligjshme në bregliqenin e Pogradecit

Ministri i Turizmit, Kulturës dhe Sportit, Blendi Gonxhja, ka bërë të ditur se Inspektorati i Agjencisë Kombëtare të Bregdetit ka vijuar inspektimet në vijën bregliqenore të Pogradecit, me fokus zbatimin e kontratave dhe administrimin e rregullt të hapësirave publike.

Përmes një postimi në rrjetet sociale, Gonxhja njoftoi se gjatë kontrolleve në terren u liruan çadrat e vendosura jashtë sipërfaqes së miratuar, ndërsa ndaj subjekteve që kishin shkelur rregullat u vendos masa administrative “Paralajmërim”, në përputhje me legjislacionin në fuqi.

“Inspektime në vijën bregliqenore të Pogradecit

Inspektorati i Agjencisë Kombëtare të Bregdetit vijon kontrollet në terren për garantimin e zbatimit të kontratave dhe administrimin e rregullt të hapësirave publike.

Gjatë inspektimit u bë lirimi i çadrave të vendosura jashtë sipërfaqes së miratuar, gjithashtu u mor dhe masë administrative “Paralajmërim”, për subjektet shkelëse, në përputhje me legjislacionin në fuqi.

Hapësirat publike janë për të gjithë. Respektimi i rregullave garanton një bregdet dhe vijë bregliqenore të mirëmenaxhuar për qytetarët dhe vizitorët”, shkruan ministri.