GREQI – Dy viktima pas rrëzimit të një ”F-4 Phantom” gjatë një shfaqjeje ajrore

ATHINË, 6 shtator /ATSH-ANA/ – Dy pilotë të Forcave Ajrore Greke humbën jetën pasi avioni luftarak ”F-4 Phantom” me të cilin po fluturonin u rrëzua dje rreth orës 15:00, gjatë një spektakli ajror në bazën ajrore të Tanagrës, në kuadër të “Athens Flying Week 2026”.

Pas rrëzimit, avioni u përfshi nga flakët, ndërsa në zonën pyjore pranë aeroportit shpërtheu një zjarr.

Për shuarjen e flakëve u mobilizuan 95 zjarrfikës, 29 automjete zjarrfikëse, si dhe nëntë mjete ajrore dhe katër helikopterë, një prej të cilëve u përdor për koordinimin e operacionit.

Autoritetet njoftuan se trupat e dy pilotëve u gjetën dhe u nxorën nga vendi i aksidentit.

Pas aksidentit, ministri grek i Mbrojtjes Kombëtare, Nikos Dendias, ndërpreu programin e tij në Panairin Ndërkombëtar të Selanikut dhe u nis drejt Athinës.

Dendias shprehu ngushëllimet e tij për familjarët dhe kolegët e dy pilotëve, duke theksuar se mendimet e Ministrisë së Mbrojtjes janë me ta në këtë moment të rëndë.

Me vendim të ministrit të Mbrojtjes Kombëtare, në Forcat e Armatosura Greke është shpallur një periudhë treditore zie, nga e shtuna, 5 shtator, deri të hënën, 7 shtator, në nderim të dy pilotëve që humbën jetën.

Ngjarja ndodhi gjatë zhvillimit të “Athens Flying Week 2026”, një prej aktiviteteve kryesore ajrore të zhvilluara në bazën ajrore të Tanagrës.

Autoritetet greke kanë nisur hetimet për zbardhjen e shkaqeve të rrëzimit të avionit./ a.jor.