Gruaja më e kërkuar në Gjermani burgoset pas tre dekadash arratisjeje nga policia

Një gjykatë gjermane ka dënuar Daniela Klette, ish-anëtare e Fraksionit të Ushtrisë së Kuqe, e njohur edhe si grupi Baader-Meinhof, me 13 vite burg për grabitje të armatosura të kryera gjatë tre dekadave duke jetuar e fshehur në sy të publikut.

Prej kohësh gruaja më e kërkuar në Gjermani, Klette ishte anëtarja e fundit femër e rrjetit terrorist të ekstremit të majtë ende në arrati përpara arrestimit të saj në banesën në Berlin, në shkurt të vitit 2024.

Pas një gjyqi 14-mujor nën masa të rrepta sigurie, gjykata rajonale e Verden e shpalli atë fajtore për gjashtë akuza për grabitje të rënduar në lidhje me rrëmbim për shpërblim dhe posedim të armëve ushtarake.

67-vjeçarja u dënua për grabitje të kryera midis viteve 1999 dhe 2016 pas shpërbërjes së RAF-it, të cilat kishin për qëllim financimin e jetës së të arratisurve të mbetur në fshehtësi.

“Ata i kryen grabitjet e tyre me një ndarje pune dhe në një mënyrë shumë konspirative”, tha kryetari i trupit gjykues, Lars Engelke.

Klette kaloi më shumë se 30 vjet duke i shpëtuar policisë derisa u kap duke jetuar nën një pseudonim në kryeqytetin gjerman.

Oficerët zbuluan një sasi të madhe armësh dhe një bazukë të rreme në apartamentin e saj në lagjen Kreuzberg, ku ajo kishte jetuar për rreth 20 vjet, si dhe dokumente identiteti të falsifikuara, paruke, ar dhe 240,000 euro.

Prokurorët, të cilët kishin kërkuar dënimin maksimal prej 15 vitesh, thanë se Klette dhe bashkëpunëtorët e saj, Burkhard Garweg, 57 vjeç, dhe Ernst-Volker Staub, 72 vjeç, kishin në shënjestër automjete të transportit të parave të gatshme dhe supermarkete në tre shtete. Besohet se treshja ka vjedhur më shumë se 2 milionë euro.

Hetuesit thanë se kishin gjetur ADN-në e të dy burrave në apartamentin e Klette kur ajo u kap, përfshirë edhe në një furçë dhëmbësh elektrike. Staub dhe Garweg janë ende të lirë.

Mbrojtja kishte argumentuar për lirimin e saj nga akuzat, duke thënë se nuk kishte prova për përfshirjen e saj në grabitje dhe se akuzat për armëmbajtje nuk meritonin më shumë se një dënim me kusht.

Në fillim të procedurave në mars të vitit 2025 , Klette, tani flokëbardhë, theu heshtjen për të kundërshtuar atë që ajo e quajti një gjyq të motivuar politikisht dhe u zotua të qëndronte besnike ndaj luftës kundër “kapitalizmit dhe patriarkatit”.

Prokurorët gjithashtu e akuzojnë Klette për tre sulme me motive politike në vitet 1990, ndërsa RAF ishte ende aktiv, por këto akuza po trajtohen në procedura të ndara në Frankfurt.

Ajo nuk mund të gjykohet më për anëtarësim në një organizatë terroriste, pasi afati i parashkrimit për këtë akuzë skadoi në vitin 2018, 20 vjet pasi grupi u shpërbë.

Me një emër të rremë, Klette ishte thellësisht e përfshirë në një qendër kulturore braziliane në Berlin për disa vite, ku praktikoi capoeira , një art marcial afro-brazilian që kombinon vallëzimin dhe luftimin. Mendohet se zbulimi i fotografive të saj me grupin e saj të capoeira në karnavalin vjetor të kulturave në Berlin, duke buzëqeshur, me një shami të bardhë në kokë dhe duke hedhur konfeti me petale – çoi në identifikimin dhe arrestimin e saj.

RAF, e njohur edhe si banda Baader-Meinhof sipas anëtarëve themelues të saj, Andreas Baader dhe Ulrike Meinhof, ishte pas një fushate terrori në atë që atëherë ishte Gjermania Perëndimore në vitet 1970 dhe 1980, duke përfshirë sulme, rrëmbime, shpërthime bombash dhe vrasje.

Grupi radikal antikapitalist mori armët kundër asaj që e shihnin si imperializëm amerikan dhe një shtet gjerman “fashist” ende të mbushur me ish-nazistë. Besohet se është përgjegjës për vrasjen e të paktën 30 personave dhe plagosjen e 200 të tjerëve.