Hakeri iranian Amir Barati do t’i ekstradohet SHBA-së: Gjykata e Lartë në Podgoricë miratoi procedurën e thjeshtuar

Gjykata e Lartë në Podgoricë vendosi në procedurë të thjeshtuar që hakeri iranian Amir Barati t’i ekstradohet Shteteve të Bashkuara. Vendimi është dërguar për ekzekutim në Ministrinë e Drejtësisë së Malit të Zi, njoftojnë autoritetet.

Ministri i Drejtësisë Bojan Bozhoviq e konfirmoi vendimin për portalin “Vijesti”, duke shtuar se ministria malazeze ka njoftuar Departamentin e Drejtësisë së SHBA-së dhe se procedurat e mëtejshme do të zbatohen në bashkëpunim me shërbimet policore.

Barati, anëtar i Gardës Revolucionare të Iranit (IRGC), akuzohet nga SHBA-ja se me sulme kibernetike i shkaktoi infrastrukturës amerikane dëme prej 3,4 miliardë dollarësh. Ai u arrestua në fund të qershorit në një aksion të përbashkët të policisë malazeze dhe Byrosë Federale të Hetimit (FBI).

Sipas policisë, zyrtarë të Sektorit për Luftën kundër Krimit — NCB Interpol Podgorica dhe ekipi FAST për kërkime ndërkombëtare, në bashkëpunim me Departamentin e Sigurisë së Kotorrit, me kërkesë direkte arrestimi nga autoritetet amerikane dhe FBI-ja, lokalizuan dhe arrestuan në territorin e komunës së Kotorrit 39-vjeçarin, shtetas i Turqisë dhe Iranit — objektiv me profil të lartë në fushën e krimit kibernetik dhe të organizuar, për të siguruar praninë e tij në procesin penal që zhvillohet ndaj tij në SHBA, para Gjykatës së Lartë në Nju-Jork, për akuza të shumta: komplot për mashtrim kompjuterik dhe hakërim, si dhe vjedhje identiteti.

Që nga viti 2013, si bashkëpunëtor i një personi juridik nga territori i Iranit, ai kreu sulme masive kibernetike kundër infrastrukturës së SHBA-së — mbi 150 universitete amerikane u vunë në shënjestër; të dhënat e vjedhura dhe qasjet në llogaritë universitare të komprometuara u përdorën në dobi të IRGC-së dhe përdoruesve të tjerë iranianë, përfshirë universitete me seli në Iran.

Aksioni vazhdon bashkëpunimin e shkëlqyer mes NCB Interpol Podgorica dhe FBI-së, që në tre vitet e fundit rezultoi me lokalizimin dhe arrestimin e 7 personave në Mal të Zi, të kërkuar nga FBI-ja dhe organet gjyqësore të SHBA-së.

Burimi: Vijesti