Harta e rreme me rastet me hantavirus alarmon përdoruesit në rrjetet sociale

Një hartë që po qarkullon gjerësisht në rrjetet sociale po përdoret në mënyrë të rreme për të pretenduar se virusi Hantavirus po përhapet me shpejtësi në Europë dhe Amerikën e Veriut.

Sipas një verifikimi të publikuar nga Euronews, harta nuk paraqet raste të konfirmuara të infeksionit, por vetëm lajme dhe raportime të publikuara online për virusin.

Pamjet janë marrë nga faqja “HantavirusMap.com” dhe janë shpërndarë në platforma si X dhe TikTok pas shpërthimit të virusit në anijen turistike MV Hondius. Përdorues të ndryshëm pretenduan se pikat e kuqe dhe portokalli në hartë tregonin raste të konfirmuara të Hantavirusit në vende të ndryshme të botës, por krijuesi i hartës ka sqaruar se ajo është ndërtuar vetëm për të ndjekur mbulimin mediatik dhe jo për të raportuar infektime reale.

Sipas Organizatës Botërore të Shëndetësisë, deri më tani janë konfirmuar disa raste të lidhura me shpërthimin në anijen MV Hondius, por autoritetet shëndetësore theksojnë se nuk ka shenja të një pandemie apo përhapjeje të pakontrolluar në Europë.

Ekspertët shpjegojnë se Hantavirusi transmetohet kryesisht nga brejtësit dhe rastet në Europë mbeten të rralla. Qendra Europiane për Kontrollin e Sëmundjeve ka vlerësuar se rreziku për popullatën europiane është shumë i ulët.