Henry kurorëzon trajnerin Arteta: Ky Arsenal, më i fortë se i imi dhe “Të pathyeshmëve”

I rikthyer në krye të Premier League dhe në finale të Champions League pas 20 vitesh. Pa asnjë dyshim, ishte java e Arsenalit. Skuadra e trajnerit Arteta po bën diçka të jashtëzakonshme, duke hyrë në historinë e “Topçinjve”.

Dhe sipas një legjende kalibri të klubit, Thierry Henry, edhe sot shënuesi më i mirë i të gjitha kohërave për Arsenalin me 228 gola, kjo skuadër është më e fortë se e “Të pathyeshmëve” të 2004-ës, kur u shpall kampione në Premier League pa asnjë humbje.

“Kur sheh atë që ky grup ka realizuar, duhet të kthehesh pas në mendime, – ka thënë “Titi” për CBS. – Shpesh flasim për “Të pathyeshmit” e 2004-ës, por çfarë duhet të themi për këtë skuadër të pathyeshme në Champions League? Është në një nivel krejt tjetër. Në Europë nuk ka marzh gabimi. E pamë qartë në gjysmëfinale ndaj Atlético.

Të gjithë mendonin: ‘Ky është një matkh, sepse e dimë se sa atyre u pëlqen të na tërheqin në baltë. Por Arsenali u tregua i duruar, i mundi me të njëjtën mënyrë loje, në një ndeshje shahu mental”.

Më tej Henry ka theksuar se ky Arsenal e ka shkruar tashmë historinë: “Të shkosh në finale pa asnjë humbje është një tregues i qartë për botën se Arsenali po ndryshon standardet. Jam një tifoz dhe të shoh klubin tim të mishërojë ADN-në e veriut të Londrës me shumë klas, emocionohem dhe jam gati të qaj.”