Incident mes të paraburgosurve kavçanë në Spuzh: Miloševiq, Stanišiq dhe Kažiq u përleshën — ‘çmimin’ më të rëndë e pagoi Božoviqi

Një incident mes të paraburgosurish të dyshuar si anëtarë të klanit kavçan ka ndodhur sot gjatë orarit të vizitave në Burgun Hetues të Spuzhit, mëson gazeta malazeze “Vijesti”. Marijo Miloševiq u përlesh me Radoslav “Gile” Stanišiqin, ndërsa pas tyre edhe Zoran Kažiq iu drejtua Stanišiqit.

Sipas një burimi, çmimin më të rëndë e pagoi kotorrasi Igor Božoviq, i cili u përpoq t’i ndante bashkëkavçanët e zënë. Bashkëbiseduesi i “Vijesti”-t pohon se, ndërsa po përpiqej t’i ndante, Božoviqi u godit disa herë nga Marijo Miloševiqi.

Burime jozyrtare nga Drejtoria për Zbatimin e Sanksioneve Penale (UIKS) pohojnë se zyrtari i tyre që ndodhej në dhomën e vizitave reagoi me shpejtësi dhe parandaloi shndërrimin e incidentit në një përleshje fizike të plotë. Drejtoria e burgut të Spuzhit ka njoftuar për ngjarjen Drejtorinë e Policisë.

Në momentin e incidentit, në dhomën e vizitave ndodheshin disa të paraburgosur të cilësuar si anëtarë të celulës kavçane të të ashtuquajturit Kartel Ballkanik të Narkotikëve.

Marijo Miloševiq është një nga të akuzuarit për vrasjen e Miodrag Kruščiqit, për sulmin ndaj gazetares Olivera Lakiq dhe për kontrabandën e 554 kilogramëve marihuanë nga Shqipëria në Mal të Zi; në dhjetor të vitit të kaluar u dënua në shkallë të parë me 30 vjet burg për vrasjen e Radomir Gjuričkoviqit.

Radoslav Stanišiq u arrestua në fund të gushtit me urdhër të Prokurorisë Speciale Shtetërore, i dyshuar për pjesëmarrje në tentativën e vrasjes së Igor Krstoviqit. Ndërsa Zoran Kažiqit, ndër të tjera, i gjykohet procesi ku Prokuroria Speciale e akuzon atë, bashkë me Slobodan Kašćelanin, Radoje Zvicerin e të tjerë, për krijimin e organizatës kriminale dhe për vrasjen e Nikolla Stanišiqit në gusht 2020.

Burimi: Vijesti