ITALI – Inaugurohet në Napoli Konsullata e Nderit e Republikës së Shqipërisë

– Sot, në Villa Doria d’Angri, në Napoli, u inaugurua Konsullata e Nderit e Republikës së Shqipërisë, në prani të kryeministrit Edi Rama, konsullit të nderit Giuseppe Lettieri, zëvendësministrit të Jashtëm Edmondo Cirielli, ambasadores shqiptare në Itali, Anila Bitri, presidentit të Rajonit të Kampanias, Roberto Fico, kryetarit të Bashkisë së Napolit, Gaetano Manfredi dhe prefektit të Napolit, Michele Di Bari, si dhe të shumë përfaqësuesve të institucioneve, botës akademike, ekonomike dhe shoqërisë civile, sipas “Italpress”.

Në qendër të ceremonisë, ishte marrëdhënia mes Italisë dhe Shqipërisë, si dhe lidhja historike dhe kulturore mes dy vendeve.

“Italia nuk është një nga partnerët tanë kryesorë ekonomikë, politikë dhe evropianë, Italia është alter egoja jonë evropiane”, tha Rama, duke theksuar marrëdhënien e veçantë me Napolin, të cilin e cilësoi “pasqyra jonë në këtë anë të detit”.

“Ne jemi napolitanët e bregut tjetër. Jemi krenarë që jemi të tillë dhe nuk duam të bëhemi milanezë”, shtoi kryeministri Rama, duke iu referuar gjenialitetit dhe shpengimit të Napolit.

Rama theksoi më pas rrugëtimin e Shqipërisë drejt Bashkimit Evropian.

“Nëse Napoli i mbijeton Bashkimit Evropian, do t’i mbijetojmë edhe ne”, tha ai me shaka.

Kryeministri Rama falënderoi gjithashtu konsullin e nderit, Giuseppe Lettieri për punën e bërë ndër vite, për forcimin e marrëdhënieve mes Shqipërisë dhe Italisë, si dhe për nxitjen e marrëdhënieve mes bizneseve dhe institucioneve të dy vendeve.

Gjatë ceremonisë mbajti një fjalim edhe Gianni Letta, gazetar dhe ish-politikan italian, i cili ka shërbyer për shumë vite si nënsekretar i Këshillit të Ministrave të Italisë, veçanërisht gjatë qeverisë të Silvio Berlusconi – i cili theksoi rëndësinë e kultivimit të marrëdhënieve mes Italisë dhe Shqipërisë përmes diplomacisë.

“Marrëdhëniet e mira mes vendeve, ashtu si mes njerëzve, ruhen të tilla vetëm nëse kultivohen. Dhe diplomacia shërben pikërisht për këtë”, tha ai.

Sipas Letta, konsullata e re mund të kontribuojë për kultivimin e kësaj ndjenje dhe për forcimin e marrëdhënieve përmes bizneseve, punës, kulturës dhe dëshmive.

“Diplomacia është arti i mbajtjes gjallë dhe aktive të marrëdhënieve ndërkombëtare, duke siguruar që ato të jenë gjithmonë të gatshme për të reaguar”, shtoi ai.

Për ambasadoren shqiptare në Itali, Anila Bitri, dita e sotme është “një ditë e rëndësishme dhe domethënëse”, ndërsa rihapja e konsullatës përfaqëson një dëshmi të mëtejshme të marrëdhënies së ngushtë, të qëndrueshme, të strukturuar dhe vëllazërore mes dy vendeve.

“Napoli përfaqëson prej shekujsh, një urë të lashtë mes Shqipërisë dhe Italisë dhe është shtëpi e një komuniteti të konsiderueshëm shqiptar”, theksoi ajo.

Zëvendësministri i Jashtëm, Edmondo Cirielli vuri në dukje rolin historik të Napolit si kryqëzim mesdhetar dhe diplomatik, duke kujtuar praninë në qytet të më shumë se 80 përfaqësive konsullore.

Cirielli rikonfirmoi gjithashtu angazhimin e Italisë për rrugëtimin evropian të Shqipërisë, duke theksuar përparimet e arritura nga Tirana dhe forcimin e bashkëpunimit mes dy vendeve, pas samitit të Romës të vitit 2025 dhe nënshkrimit të mëvonshëm të marrëveshjes së bashkëpunimit strategjik.

Kryetari i Bashkisë së Napolit, Manfredi deklaroi se kishte zhvilluar një bisedë private me Edi Ramën, gjatë së cilës lindi ideja dhe mundësia për zhvillimin e një binjakëzimi mes Napolit dhe Durrësit.

Fico, presidenti i Rajonit të Kampanias, theksoi nevojën për forcimin e lidhjes tashmë të fortë me Gadishullin Ballkanik.

Në përfundim të aktivitetit, në tarracën e vilës, e cila ka pamje nga Gjiri i Napolit dhe Vezuvi, u zhvillua prerja tradicionale e tortës. /