Katër kopje të librit të ri për Princeshë Dianën vidhen në Holandë

Katër kopje të librit të ardhshëm të Earl Spencer për motrën e tij, Diana, Princesha e Uellsit, janë vjedhur nga një kamion në Holandë, vetëm pak ditë para publikimit ndërkombëtar.

Sipas raportimeve të mediave britanike, kopjet në gjuhën holandeze të librit “Swan Song: Diana, Motra ime” u vodhën gjatë transportit nga një shtypshkronjë drejt magazinës së botuesit holandez.

Raportohet se shoferi ishte ndalur në një parking për pushimin e detyrueshëm dhe po flinte në kabinën e kamionit kur ndodhi vjedhja. Policia holandeze është në dijeni të rastit dhe ka nisur hetimet.

Kamioni transportonte mijëra kopje të librit, por hajdutët morën vetëm katër prej tyre. Nuk dihet nëse librat u shënjestruan për shkak të përmbajtjes së tyre të papublikuar apo u morën pa u ditur çfarë përmbanin.

Libri pritej të publikohej në Britani dhe në tregjet ndërkombëtare më 22 shtator. Në të, Charles Spencer rrëfen jetën e motrës së tij nga këndvështrimi personal, duke përfshirë kujtime nga fëmijëria e tyre, martesa e Dianës dhe periudha që rrethoi vdekjen e saj.

Diana humbi jetën në një aksident automobilistik në Paris më 31 gusht 1997, në moshën 36-vjeçare. Në atë kohë, djemtë e saj, Princi William dhe Princi Harry, ishin përkatësisht 15 dhe 12 vjeç.

Spencer ka thënë se vendosi të shkruante kujtimet e tij për të treguar historinë e Dianës nga perspektiva e vëllait të saj, duke argumentuar se dëshironte të fliste për të në mënyrë të hapur dhe pozitive.