Katër viktima në Krime pas sulmit të një ushtari ndaj kolegëve dhe civilëve

Katër persona, përfshirë tre civilë, u vranë nga një ushtar i paidentifikuar në qytetin bregdetar të Sevastopolit, në Krimenë e aneksuar nga Rusia, njoftoi të martën guvernatori i qytetit i emëruar nga Moska.

“Një tragjedi në Sevastopol. Sipas informacioneve paraprake, një ushtar hapi zjarr ndaj kolegëve të tij ushtarakë, duke vrarë një person, e më pas sulmoi civilët, duke vrarë tre prej tyre,” shkroi në Telegram Mikhail Razvozhayev.

Ai shtoi se autori i sulmit, kombësia e të cilit nuk u bë e ditur dhe motivet e të cilit mbeten ende të paqarta, u arrestua.

“Shërbimet e emergjencës, hetuesit dhe ekspertët e mjekësisë ligjore ndodhen aktualisht në vendngjarje. Po hetohen të gjitha rrethanat dhe shkaqet e asaj që ndodhi,” shtoi kreu i administratës së qytetit, i emëruar nga Rusia.

Ai u bëri thirrje gjithashtu qytetarëve të qëndrojnë të qetë, t’u besojnë vetëm informacioneve zyrtare dhe të mos përhapin thashetheme të paverifikuara.

Sipas Razvozhaevit, viktimat civile ishin dy burra, të moshës 71 dhe 59 vjeç, si dhe një grua 64-vjeçare.

Krimeja, një gadishull që Rusia e aneksoi në mënyrë të paligjshme nga Ukraina në vitin 2014, ka qenë prej javësh objekt i sulmeve hakmarrëse të Ukrainës, të cilat synojnë të pengojnë logjistikën e forcave ruse të vendosura në jug të Ukrainës.

Rusia nisi pushtimin e saj në shkallë të plotë të Ukrainës në shkurt 2022 dhe ka kryer vazhdimisht sulme ndaj vendit fqinj, përfshirë edhe nga territori i Gadishullit të Krimesë.