Kishin humbur rrugën në Dajt, policia ndihmon 2 turistët gjermanë: Ishin në një terren të vështirë

Policia e Tiranës ka ndërhyrë mbrëmjen e së dielës për të ndihmuar dy turistë gjermanë të cilët kishin humbur rrugën në zonën e Dajtit. Policia bën me dije se ndërhyrja u krye rreth orës 20:15 në një terren malor në afërsi të Qafë Mollës.

2 turistët u lokalizuan në një terren të vështirë ku më pas iu dha ndihma e nevojshme. Ata u shoqëruan nga zona ku kishin humbur rrugën dhe fatmirësisht ishin në gjendje të mirë shëndetësore.

“Tiranë/Policia iu shkon në ndihmë 2 turistëve gjermanë që kishin humbur rrugën në mbrëmje, në zonën pas malit të Dajtit.

Rreth orës 20:15 të datës 13.09.2026, Policia e Tiranës u njoftua se 2 turistë gjermanë kishin nevojë për ndihmë, pasi kishin humbur rrugën, në një terren malor në afërsi të Qafë Mollës. Menjëherë, shërbimet e Komisariatit të Policisë Nr. 4 organizuan punën për lokalizimin dhe shoqërimin e tyre, në terren të sigurt për ta.

Si rezultat i veprimeve të menjëhershme të shërbimeve të Policisë, 2 turistët u lokalizuan në një terren të vështirë, iu dha ndihma e nevojshme dhe u shoqëruan nga zona ku kishin humbur rrugën, në gjendje të mirë shëndetësore.

Ata falënderuan Policinë e Tiranës, për reagimin e menjëhershëm dhe asistencën e ofruar. Policia e Shtetit mbetet maksimalisht e angazhuar për garantimin e sigurisë së qytetarëve, vizitorëve dhe turistëve, dhe fton që për çdo problematikë apo situatë emergjente, të telefonojnë në numrin pa pagesë 112”, njofton policia.