Komuniteti hebre në Mal të Zi shënoi Jom Kipurin — ditën më të shenjtë të vitit

Bashkësia fetare e hebrenjve të Malit të Zi shënoi Jom Kipurin, një nga festat më të mëdha në judaizëm — Ditën e Pendimit, ditën më të shenjtë të vitit për hebrenjtë.

Jom Kipuri shënohet me agjërim të plotë, pa ushqim e pa ujë, i cili nisi të dielën në mbrëmje dhe zgjati deri të hënën në mbrëmje.

Në Mal të Zi, disa qindra hebrenj nga të gjitha shtresat e shoqërisë morën pjesë në lutje dhe agjërim në sinagogat e Podgoricës dhe Budvës, bëri të ditur bashkësia hebraike.

Rabini suprem i Malit të Zi, Ari Edelkopf, tha se Jom Kipuri ka “fuqi të thellë për të shlyer mëkatet” dhe se “është mbushur me emocione, kujtime dhe meditim… njëkohësisht, është edhe ditë e gëzueshme. Të çliruar nga prangat e jetës së përditshme, ngrihemi atje ku jemi një me Zotin, një me shpirtin tonë dhe një me njëri-tjetrin”.

Ai kujtoi se “Zoti e zgjodhi Jom Kipurin si ditën e faljes” dhe se “lidhja jonë me Zotin është më e fortë se çdo shkelje”.

Burimi: RTCG