Ku ka përfunduar Kristjan Asllani? Interi kërkon shitjen përfundimtare të mesfushorit kuqezi

Lojtari shqiptar, zikaltër që prej vitit 2022, u dëmtua gjatë grumbullimit në Gjermani. Klubi këtë herë nuk mendon për huazim, por për shitje.

Ku ka përfunduar Kristjan Asllani? Te lojtarët në dalje nga Interi është edhe mesfushori i kombëtares shqiptare, por ndryshe nga Frattesi dhe Pavard – që gjithashtu duhet të largohen – ai nuk ka udhëtuar me ekipin për turneun aziatik për shkak të dëmtimit të pësuar në Gjermani. Shqiptari është jashtë projektit të trajnerit Chivu.

Asllani ka mbetur në Itali për stërvitje, në pritje të një sistemimi. Që kur u bashkua me Interin në 2022-shin ai nuk ka mundur asnjëherë të imponohet si titullar. Mesfushori u ble për 14 milionë euro është në merkato prej disa muajsh.

Sezoni i kaluar ishte kompleks: te Torino deri në janar, ku luajti 15 ndeshje, pastaj te Beshiktashi, 2 gola në 14 ndeshje. Asllani u rikthye tek Interi i vetëdijshëm se duhet të largohet sërish.

Në miqësoren e parë sezonale Chivu e aktivizoi në qendër të mbrojtjes për shkak të mungesave të shumta nga Botërori dhe merkato. Një tregues i qartë se është jashtë prej kohësh për projektin e së ardhmes. Për Asllanin po kërkohet një sistemim i përshtatshëm dhe çmimi është 10-12 milionë euro. Mund të jetë një operacion i ditëve të fundit të merkatos.