Kuvendi: Kryerevizori shtetëror nuk dërgohet në pension, qëndron deri në fund të mandatit

Me nënshkrimet e katër deputetëve të VMRO-DPMNE-së, në seancën e sotme të Komisionit për Financim dhe Buxhet u miratuan 13 amendamente të propozimit të Ligjit për revizionin shtetëror.

Ndër ndryshimet e tjera, deputetët e partisë në pushtet propozojnë që kryerevizorit shtetëror të mos i ndërpritet mandati me plotësimin e kushteve për pension, por të qëndrojë në detyrë deri në përfundimin e mandatit nëntëvjeçar.

Deputeti Martin Stojanovski nga VMRO-DPMNE-ja e lexoi amendamentin dhe shpjegoi shkurt se ka karakter teknik. Zëvendësministri i Financave e pranoi amendamentin.

Edhe në Ligjin ekzistues për revizionin shtetëror, edhe në propozimin e ri nga gushti i këtij viti, shkruhet se mandati i kryerevizorit shtetëror ndërpritet me plotësimin e kushteve për pension.

Nëse ky ndryshim miratohet edhe në seancë plenare, kjo do të thotë se revizori aktual shtetëror, Maksim Acevski, në vend që mandati t’i përfundojë në shkurt 2028, kur plotëson kushtet për pension, do të qëndrojë në detyrë edhe nëntë muaj të tjerë, deri në dhjetor 2028.

Seanca për ndryshimet e propozimit të Ligjit për revizionin shtetëror zgjati më pak se 20 minuta dhe kaloi pothuajse pa diskutime nga deputetët. Në seancë u miratuan edhe ndryshime të tjera ligjore, si për shembull që Drejtoria e Revizionit Shtetëror të hartojë raport përmbledhës për revizionet në subjektet juridike të së njëjtës veprimtari.

Burimi: 4NEWS