Lljiljaniq: Çështja e të gjitha çështjeve është nëse Kuvendi do ta miratojë buxhetin

Zëvendëskryetarja e Podgoricës, Nađa Ljiljanić, e vlerësoi si «çështjen e të gjitha çështjeve» fatin e buxhetit të Kryeqytetit për vitin e ardhshëm, duke paralajmëruar se ka gjasa të mëdha që ai të mos miratohet nga Kuvendi. Në një intervistë për gazetën malazeze Dan, ajo tha se mosmiratimi i buxhetit do të sillte financim të përkohshëm, të cilin e cilësoi si «më të keqin për qytetarët e Podgoricës».

Për miratimin e një sërë vendimesh në Kuvendin e Kryeqytetit duhen 30 vota, por sipas Ljiljaniqit, opozita – në prag të një viti zgjedhor – nuk ka interes ta votojë buxhetin. «Meqenëse para nesh është një vit zgjedhor, opozita me siguri nuk do ta votojë buxhetin», deklaroi ajo.

Megjithatë, zëvendëskryetarja beson se zgjidhja ekziston: me një bisedë korrekte dhe një dokument të mirë buxhetor, buxheti i vitit të ardhshëm mund të miratohet. Ajo bëri thirrje që buxheti të miratohet me një konsensus të gjerë mes pushtetit dhe opozitës, me lëshime të ndërsjella, duke theksuar se politika duhet të «përzihet sa më pak» në këtë proces. «Nëse një projekt është i mirë, duhet ta votojnë të gjithë», tha Ljiljaniq.

Sipas saj, pushteti ekzekutiv mund t’ia dalë deri në fund të vitit me buxhetin ekzistues për punime të caktuara, por nëse buxheti i vitit të ardhshëm nuk miratohet, situata do të bëhet e vështirë si për pushtetin, ashtu edhe për qytetarët. Ajo pranoi se deri më tani nuk ka pasur bisedime kompromisi me opozitën.

Ljiljaniq shtoi gjithashtu se fushata për zgjedhjet e vitit 2027 në shumë segmente ka nisur tashmë, por qytetarët duhet të mbeten prioritet. «Kjo është një periudhë e heshtur, por fushata në shumë segmente ka filluar tashmë. Megjithatë, nuk duhet t’i lëmë pas dore qytetarët», u shpreh ajo.

Burimi: RTCG