MANS i thotë Spajiqit: Një premtim i pambajtur nuk mund të jetë mbulesë financiare e një tjetri

Rrjeti i organizatave joqeveritare MANS i ka dërguar një porosi të drejtpërdrejtë kryeministrit të Malit të Zi, Milojko Spajiq: qëndrueshmëria e politikës ekonomike të qeverisë, e njohur si “modeli europian”, nuk mund të justifikohet me të ardhura nga asetet kriminale që shteti ende nuk i ka gjetur, nuk i ka konfiskuar përgjithmonë dhe nuk i ka shndërruar në para.

Sipas MANS-it, “modeli italian” që kjo organizatë e ka propozuar prej vitesh nuk është zbatuar asnjëherë, reforma sapo ka filluar dhe institucionet nuk kanë kapacitet për hetime komplekse financiare. Madje edhe premtimi për një “Guardia di Finanza” malazeze, sipas tyre, mbeti thjesht premtim.

“Asetet e bllokuara përkohësisht nuk janë të ardhura buxhetore; vlera e vlerësuar e apartamenteve dhe kompanive nuk është para në llogarinë e shtetit; shitjet e rastësishme të aseteve të konfiskuara nuk ofrojnë një burim të qëndrueshëm për detyrime të përhershme si pagat dhe pensionet”, thuhet në reagimin e MANS-it.

Organizata thekson se pa institucione funksionale, rezultate të matshme dhe projeksione të verifikueshme, përmendja e këtyre të ardhurave është një premtim politik, e jo dëshmi e qëndrueshmërisë. “Një premtim i pambajtur nuk mund të jetë mbulesë financiare e një tjetri”, përfundon MANS.

Kryeministri i Malit të Zi, Milojko Spajić (Foto: belgium24.eu, licencë CC BY 2.0)

Burimi: RTCG